USA-p nunanut allanut ministeria Mike Pompeo maajip 9-ani tikeraassaaq

USA-p nunanut allanut ministeria Mike Pompeo ulloq 9. maj Kalaallit Nunaannut tikeraassaaq

USA-p nunanut allanut ministeria Mike Pompeo ulloq 9. maj Kalaallit Nunaannut tikeraassaaq. Nunanut Allanut Naalakkersuisoq Ane Lone Bagger taamatullu Danmarkimi nunanut allanut ministeri Anders Samuelsen tikeraartitsisuussapput. Pompeop Nuummiinnermi aammattaaq Naalakkersuisut Siulittaasuat Kim Kielsen ataatsimeeqatigissavaa.

Kalaallit Nunaannut tikeraarnermi USA aamma Kunngeqarfik Danmarkip akornanni issittumut tunngatillugu apeqqutini ataatsimoorluni soqutigisat aamma amerikamiut Kalaallit Nunaanni susassaqarnerulersinnaanerat oqallisigineqassapput.

Naalakkersuisoq Ane Lone Bagger Oqaaseqarpoq:
Pompeop Kalaallit Nunaannut tikilluaqqunissaa qilanaaraara. Tamanna nunatta takutinnissaanut nunatsinnilu pissutsinik kissaatigisatsinnillu paasisaqarnissamut periarfissaalluarpoq. Sanilitsinnut suleqatigisatsinnullu USA-mut pitsaasumik attaveqarnissarput kissaatigaarput. Issittup eqqissinartuunissaa aammattaaq amerikamiut maaniinnerata inuiaqatigiinnut iluaqutaanissaa kissaatigaagut. Qilanaaraara amerikamiut Kalaallit Nunaanni susassaqarfeqarnerat nunanut allanut ministerimut Pompeomut oqaloqatigissutigissagakku. Suleqatigiinnitta tamatsinnut iluaqutaasumik ukiorpassuarnilu pitsaasumik suleqatigiissimanitsitut nukittorsarneqarnissaa kissaatigaarput.”

Nunanut allanut ministeri Anders Samuelsen oqaaseqarpoq:
Pompeop siullermeerluni Kalaallit Nunaannut tikeraartussanngornera nuannaarutigeqaara. Tikeraarnikkut erseqqissumik paasitinneqarpugut USA apeqqutinik issittumut tunngassuteqartunik Kunngeqarfik Danmarkimillu suleqateqarnerminik pingaartitsisuusoq. USA iligisatsitut annersaavoq pingaarnerpaajullunilu aammalumi ataatsimoorluta pingaarutilinnik soqutigisaqarpugut. Isumaqarpunga ukiuni tulliuttuni amerikamiut Kalaallit Nunaanni suli tamatigoornerusunik soqutigisaqarnerat malugiumaaripput. Tamannalu Danmarkimut Kalaallit Nunaannullu pitsaassuuvoq.”

Annertunerusunik paasisaqarusuttunut: Naalakkersuisoqarfiup pisortaa Kenneth Høegh, mobil 565604, e-mail: kenh@nanoq.gl
Nunanut allanut ministerip tusagassiornermut siunnersortaa, Kasper Thams Olsen, 61 97 90 31.