Tunngaviusumik Inatsisissaq pillugu Isumalioqatigiissitaq nutaaq aajuna

Tunngaviusumik Inatsisissaq pillugu Isumalioqatigiissitaq katitigaanermigut politikkikkut siammasissumik sinniisutut aallartitaqarnissamik kissaateqarluni isumalioqatigiissitaavoq, suliamut ilisimasaqarluartunik, Kalaallit Nunaat pillugu ilisimasaqarnermikkut piukkunaateqarluarlutik Kalaallit Nunaata innuttai oqaluttuarisaanera kulturialu tunngaviusumik inatsisiliorlutik suliaqarnerminni siummersuummik allaaserisaqartussaallutik.

Tunngaviusumik Inatsisissaq pillugu Isumalioqatigiissitaq arfineq-marlunnik ilaasortaassaaq. Tamanna isumaqarpoq, partiit Inatsisartuniittut tamarmik immikkut ataatsimik ilaasortaatitaqarlutillu sinniisuutitaqartussaallutik.

Inatsisartunut qinersinermi kingullermi partii taaneqarnerpaaq Isumalioqatigiissitami siulittaasussamik toqqaassaaq, Isumalioqatigiissitamilu siulittaasup tullia Inatsisartuni partiip taaneqarnerpaap tulliata toqqassavaa.
Isumalioqatigiissitami siulersuisoqatigiit siulittaasoqassapput, siulittaasup tulleqassapput taamatuttaaq pingajoqassapput, taannalu Tunngaviusumik Inatsisissaq pillugu Isumalioqatigiissitap ilaasortaanit toqqarneqassaaq.

Partiit Isumalioqatigiissitami ilaasortaatitassaminnik toqqaanissaminnut kiffaanngissuseqarsimapput, Naalakkersuisunili ilaasortat innersuutigineqaqqusaanatik.

Ilaasortassatut toqqarneqartut ukuupput:
Siulittaasoq: Doris J. Jakobsen, Siumut
Siulittaasup tullia: Kuupik Kleist, Inuit Ataqatigiit
Ilaasortaq: Nivi Olsen, Demokraatit
Ilaasortaq: Per Rosing-Petersen, Partii Naleraq
Ilaasortaq: Bentiaraq Ottosen, Atassut
Ilaasortaq: Aleqa Hammond, Nunatta Qitornai
Ilaasortaq: Louis Sigurdsen, Suleqatigiissitsisut
Sinniisussatut toqqarneqartut ukuupput:
Suinni L. Johansen, Siumut
Marianne Jensen, Inuit Ataqatigiit
Steen Lynge, Demokraatit
Dorthe Zeeb Kristiansen, Partii Naleraq
PanínguaK M. Kruse, Atassut
Ole Aggu Markussen, Nunatta Qitornai
Anita Hoffer, Suleqatigiissitsisut
Aningaasaqarnermut Nunanilu Avannarlerni suleqatigiinnermut Naalakkersuisoq, Vittus Qujaukitsoq naggasiilluni ima oqarpoq:

”Nuannaarutigaara, Tunngaviusumik Inatsisissaq pillugu Isumalioqatigiissitaq maanna sulisinnaanngormat. Tamannalu nunatta siunissaanut sulineruvoq. Isumalioqatigiissitap suliassaraa, isumaliutissiissumik Tunngaviusumik Inatsisissap imassaanik siunnersuusiortussaalluni, nunatta siunissami namminersulernissaanut atuuttussamik. Isumalioqatigiissitap suliaata naammassineqarnerata kingorna isumaliutissiissutip inatsisissatullu siunnersuutip suliareqqinneqarnissaa Inatsisartunit aalajangiiffigineqassapput. Tassungalu ilanngullugu tunngaviusumik inatsisissamut missingiusiaq innuttaasunit qinersissutigineqassanersoq kiisalu isumaliutissiissut tunngaviusumillu inatsisissamut missingiusiaq innuttaasunit oqallisigineqarnissaata annertussusissaa qanorlu ingerlanneqarnissaa aalajangiiffigineqassallutik.”

Isumalioqatigiissitami ilaasortat nutaat qutsavigerusuppakka, suliamut taama ittumut suliaqarusullutik akuersimmata, neriuppungalu, ilaasortat tamarmik eqiasuillutik, ilisimasaqarluarlutik ataatsimoorlutillu sulinissamut tunniusimalluarlutik ataqqeqatigiillutillu Isumalioqatigiissitap suliassaa kivikkumaaraat, taamaalilluni suliap inernera innuttaasunit tiguneqassaaq Kalaallit Nunaata siunissaanut tunngaviliisuulluartussaq.
Taama oqaaseqarlunga Isumalioqatigiissitap sulilluarnissaanik kissaappara.”

Paasissutissat erseqqinnerusut pillugit immikkoortumi pisortaq Natuk Lund Olsen, oqarasuaatip normua: 345412, mail nlol@nanoq.gl atorlugit saaffigineqarsinnaavoq