Sulisartut ulluanni pilluaritsi!

All.: Kim Kielsen, Naalakkersuisut Siulittaasuat

"Sulisartoqarnerup pingaaruteqassusia apeqquserneqarsinnaanngilaq.



Suliassat suugaluartulluunniit sulisartoqanngippat piviusunngortinneqarsinnaanngillat.

Allatut oqaatigalugu sulisartoqanngikkutta nunatta assakaasorsui uninngassapput.

Suliffeqarluni inuunerup akilersinnaanerunissaa Naalakkersuisoqatigiit aamma Naalakkersuisunut Inatsisartuni tunuliaqutaasut aqqutissiuukkusuppaat. Taamaattumik akileraartarnikkut aaqqissuusseqqinnissami sulinermut ilanngaatip atuutsinneqalernissaa sulissutigineqarpoq.

Sulinermut kajumissuseqarneq sulisartut ukiorpassuarni nukittoqqutigaat. Sulinissamut kajumissuseqarnerup kinguaariinnut tullernut ingerlateqqinneqarnissaa peqatigiilluta suliassaraarput.

Nunatsinni innuttaasut utoqqaanersaat suli ulloq manna tikillugu sulisarpoq.

Anthon Geilser februarimi 100-nik ukioqalerpoq. Taamatullu ukioqaleraluarluni suli nammineq pisiniarfiutiminut ullut tamaasa suliartortarnermigut imminut pilersortuuvoq.  

100-rujunik ukioqalerluni inuuimmini tusagassiortumit aperineqarami inuiaqatigiinnut qanoq oqariartuuteqarsinnaanerluni imannak akivoq: ’’Suliniaritsi nuanneqaaq!’’ 

Oqaasiini paasisassatta ilagaat akissarsiatigut atugassarititaasut kisiisa eqqarsaatigalugit sulissagutta naammanngitsoq.

Naatsorsueqqissaartarfiup kisitsisaatai naapertorlugit 2017-ip naanerani inuusuttut 16-init 18-inut ukiullit akornanni 40 procentit suliffeqaratillu ilinniakkamik ingerlatsinngillat.

Taakku siunissami nunatsinni suliassanik kivitseqataanissaq siunertaralugu anguniagaqalernissaat peqatigiilluta sulissutigisariaqarparput.

Sulisartut sulinissamut kajumissuseqarnerat taakku aamma nangissagaat peqatigiilluta qulakkeerniartariaqarparput. Sulinermut kajumissuseqarneq sulisartut nukittoqqutigisaat – inuiaqatigiit siunissami aamma nukittoqqutigissagaat sulissutigisavarput.

Ullumikkut aamma Namminersornerulluni Oqartussaanerup atuutsinneqalerneraniit ukiut 40-nngorput.

Nunatta namminiilernissaa siunnerfigalugu alloriaqqaarnitsinni Inatsisartut Naalakkersuisullu siulliit taamanikkut atuutsilerput. Kingumut qiviarutta ingerlavigisimasatta sammivia paatsuugassaanngilaq.

Namminiileriartornissarput siunnerfigalugu ingerlanitsinni aqqut atoreersimasarput talliartuaarpoq – sulilu ornitarput siunnerfigaarput. Anguniagaq taanna piviusunngortinneqarsinnaanngilaq assakaasorsuit ingerlasinnaanngippata.

Taamaattumik sulisartoqarnerup inuiaqatigiinnut pingaaruteqassusaa apeqquserneqarsinnaanngilaq.

Ullumikkut sulisartut ullorsiornerat nalliussivarput – sulisartut tamassi ullorsiornissinni qamannga pisumik pilluaritsi!"