Imminut pilersornerulernissamut aaqqissuusseqqinnissat ataatsimoorussamik akisussaaqataaffigineqarput

Ima qulequtalimmik “Nammineq pilersornerup annertusarneqarnissaa aamma sulisussat amerlineqarnissaat” pillugu ulluni makkunani workshoppertoqarpoq. Pisortanit ikiorsiissutit pillugit aamma suliffeerunnermi ikiorsiissutit pillugit inatsisit pillugit aaqqissuusseqqinnissap piareersarneqarneranni immersueqataanissaq siunertaralugu kommuninit, suliffeqarfeqarfimmi illuatungeriinnit aamma Namminersorlutik Oqartussanit sinniisut workshoppimi peqataapput.

Suliffeqarfeqarfimmut- aamma isumaginninnermut suliassaqarfinni sulianut tunngasunut inuit pinngitsuugassaanngitsut 25. – 26. apriili suliffeerunnermi ikiorsiissutit aamma pisortanit ikiorsiissutit pillugit aaqqissuusseqqinnissat aggersut oqaloqatigiissutiginiarlugit katersuussimapput. Kommuninit ingerlatsivinni aamma Majoriami aqutsisut sulisullu peqataapput. SIK aamma Sulisitsisut kiisalu naalakkersuisoqarfiit arlallit workshoppeqartitsinermi sinniiseqarput.

Workshoppeqarnermi eqeersimaartumik oqallittoqarpoq peqataasullu suliffeerunnermi ikiorsiissutit aamma pisortanit ikiorsiissutit pillugit aaqqissuusseqqittoqarnissaata pisariaqartinneqarnera erseqqissarpaat. Inatsisit ullumikkut atuuttut ullutsinnut naleqqutinngillat aamma ersernerlullutillu eqqorluartuunngillat. Tamatuma kinguneraa ilaatigut inatsisit ulluinnarnilu sulinerup naapertuutinneqarnissaat ajornakusoorsinnaasarmat.

Massakkut inatsisaasut pillugit unammilligassat aaqqissuusseqqinnissanullu kissaatit paasinarsarneqarnissaat kommunit 5-aasut tamaasa, suliffeqarfeqarfimmi illuatungeriit aamma naalakkersuisoqarfiit arlallit katersortinneqarneranni siunertaavoq. Illuatungaani sulilernissamut kajumissuseqarnerup qaffassarneqarnissaanik pisariaqartitsinerup illuatungaanilu innuttaasup suliffeqarfeqarfimmi ilaalernissamut piareersimanissaminut tapersersorneqarnissamik pisariaqartitsineranut suliffeerunnermi ikiorsiissutinik aamma pisortanit ikiorsiissutinik aaqqissuusseqqinneq naleqqutissappat, taava aaqqissuusseqqinnerit kommunit suliffeqarfeqarfimmilu illuatungeriit oqaloqatigalugit pinissaat pingaaruteqarluinnarpoq.

Amerlanerusut sulilernissaat aaqqissuusseqqinnerni siunertarineqarpoq. Piffinni amerlasuuni inuiaqatigiit agguataarnerisa unammillernartoqarnerata sulisussanillu amigaateqarnerup ajornartorsiutaanerata suliffeqarfeqarfimmi assannik amerlanerusunik pisariaqartitsilernerput kinguneraa. Tamanna Kalaallit Nunaanni atugarissaarnerup atuuttup pigiinnarnissaanut ineriartortinnissaanullu pisariaqarpoq. Taamaammat sulisinnaasut tamarmik sulilernissaat pingaartuuvoq. Pisortanit ikiorsiissutinik pisarnerminngaanniit sulinissamut kajumissuseqarnissaq qaffanneqassaaq.

“Pisortanit ikiorsiissutit pillugit inatsit pisoqaavoq. Innuttaaqatitta pisariaqartitsisut inooqatigiinni ajuutuuinnginnissaannut ikiuutissat piareersimanissaat nutarterinerup qulakkiissavaa. Kisianni Kalaallit Nunaanni innuttaasut tamarmik ataatsimoorlutik inuiaqatigiinnut tunniussinissaminnut pisussaaffeqarmata pingaaruteqarpoq eqqaamassallugu. Aaqqissuusseqqinnermut atatillugu innuttaasut unammilligassaannaat kisiisa pinnagit periarfissaalli isiginiarneqarnissaat taamaammat pingaaruteqarpoq.” Peqqissutsimut, Isumaginninnermut Inatsisinillu atuutsitsinermut Naalakkersuisoq Martha Abelsen oqarpoq.

Aatsitassanut Suliffeqarnermullu Naalakkersuisoq Erik Jensen tassunga isumaqataavoq:
“Suliffeerukkallarnermik imaluunniit sivisuumik suliffissaaleqinermik eqqorneqarsimagaanni, nunatsinni inooqatigiinni ajuutuuinnginnissaannut ikiuutissat innuttaasut arlaannaataluunniit nakkaattuunnginnissaa qulakkiissavaat. Suliffeerukkallarneq sivisuumilluunniit suliffissaaleqineq kialluunniit misigisinnaavaa. Aappatigut sunniivigeqatigiittarneq qulakkiissavarput, taamaalilluni sulineq akissarsiaqarfiusoq pisortanit ikiorsiissutinik pisartagaqarnerminngaanniit kajuminnarnarnerulersissagatsigu.”

SIK-p siulittaasuata Jess G. Berthelsenip suliffeerunnermi ikiorsiissutit pisortanillu ikiorsiissutit aaqqissuussiffigeqqinneqarnissaat tikilluaqquaa. Oqarporlu:
“Pisortanit ikiorsiisutit pillugit inatsit malillugu akissarsiarisinnaasaminik 20 kr.-inik sinniisimasoq, ikiorsiissutisiaminik ilanngaanneqartoq takusarpara. Pisortanit ikiorsiissutinik pisartagaqartilluni suliffimmik akissarsiaqarfiusumik sulilernissamik kajumissuseqarnissaq annikitsuararsuuvoq, tassunga pissutaavoq nammineq imaluunniit aapparisap pisortanik ikiorsiissutinik pisassai ilanngarneqarsinnaammata. Taamaammat aaqqissuusseqqittoqarnissaa nuannaarutigaara.”

Sulisitsisut tamanna tapersersorpaat, takusinnaallugulu oqartussaasoqarfiit assigiinngitsut akornanni suliarisariaqartoq, aamma pisortani suliffeqarfinnilu namminersortuni tamanna aqutsisut pingaartittariaqaraat. Tamanna ilaatigut atuutilersitsinissamut pilersaarummik ersarissumik pisariaqartitsivoq, taamaalilluni aaqqissuusseqqinnerit piviusumik piviusunngortinneqarsinnaaniassammata.

Aaqqissuusseqqinnerit sulisaatsinik oqimaatsunik peersitsisut kommuninit ujartorneqarput. Taamaaliorneq innuttaasunut toraagalinnik neqerooruteqartalernissamut nukissanik pilersitsissaaq, matumani ujartuinernut siusinaartumillu suliniutinut nukissat ilanngullugit. Oqartussaasoqarfiit assigiinngitsunik suliallit suleqatigiinnerisa patajaallisarneranut atatillugu kommunit periarfissat nutaat takusinnaalluarpaat. Tamanna assersuutigalugu inuusuttut ullumikkut ilinniagaqanngitsut suliffeqanngitsullu ikilineqarnissaannut naleqqiullugu atuuppoq.

Paasisaqarnerorusukkuit naalakkersuisup allatta Inger Heilmann Larsen e-mail: ihla@nanoq.gl imaluunniit tlf. + 299 554160 aqqutigalugit attavigiuk