Jens Immanuelsen: Kommunip maleruaqqusai naapertorlugit aalisartoqassaaq

Fiskefartoej Avannaani qassusersorluni qaleralinniarnissamut piffissamik sivitsuiniarlutik qinnuteqartut Avannaata kommuniata aalisarnermut piniarnermullu ataatsimiititaliaata akuerseqataannginneranut isumaqataavunga, Aalisarnermut, Piniarnermut Nunalerinermullu Naalakkersuisoq oqarpoq.

KNAPK-ip Ilulissani immikkoortortaqarfiata qassusersorluni qaleralinniarnissaq ullunik 30-nik sivitsoqqullugu immikkut Avannaata Kommunianut apriilip sisamaanni 2019-imi qinnuteqaatigivaa.

Aalisartut peqatigiiffiata immikkut akuerineqarluni qassusersorluni Ilulissani tunisarsiorfinnit tapersersorneqarpoq. Tapersersuisut tassaallutik Royal Greenland aamma Halibut Greenland, SIK-llu immikkoortortaqarfianit.

Avannaata Kommuniata borgmesteriata Palle Jeremiassenip tusagassiuutitigut nalunaarummini erseqqissarpaa maleruagassat allanngortinneqassanngikkunik akuersissutaareersimasumut naleqqiullugu kommune suli annermik immikkut akuersissuteqarnissaq maleruagassat naapertorlugit periarfissaqanngitsoq.

Kommune qassusersornermut tunngasunik maleruaqqusanik nutaanik suliaqarnermik ingerlassaqarpoq, taakkuli aatsaat kingusinnerusumi atuutsinneqalersinnaapput.

- Isumaqarpunga kommune qassusersorluni aalisarnermut maleruaqqusanik suliaqassalluni eqqortumik iliortoq. Kommunimmi nammineerluni akisussaaffigivaa aalisariaatsit malittarisassaliuutissallugit, taakku maleruaqqusat tunngavigalugit aalajangersagaassallutik, Jens Immanuelsen erseqqissaavoq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl