Sapaatip-akunnera 18 – Inuunermi aallartilluarneq

Sapaatip-akunnera 18 tassaavoq imigassamik atueriaatsitsinnik imertariaatsitsinnillu eqqartuiffiusartoq. Ukioq manna ima qulequtaqartinneratigut: ”Inuunermi aallartilluarneq” naartunermiit meeqqatta inuunermi sapinngisamik pitsaanerpaamik aallartilluarnissaat ukkatarineqassaaq.

- Naartunermi milutsitsinermilu kiisalu ilaqutariittut mikisunik meeraqarluni inuunermi imigassartunngilluinnarnikkut meeqqallu toqqissisimasumik isumassorneqartumillu perorsarnerisigut meeqqat pitsaasumik sivisuumillu inuuneqarnissaat toqqammavissiussavarput, taama Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Sapaatip-akunnera 18 nuna tamakkerlugu malunnartinneqassaaq. Ukioq manna Naalakkersuisup, Martha Abelsenip, illoqarfinnit 10-nit aamma nunaqarfinnit 26-nit Sapaatip-akunnerani 18-imi sammisaqartitsinissamut tapiissutitut qinnuteqaatit akuerai.

- Nuannerpoq Sapaatip-akunnerata 18-ip malunnartinniarneranut taama soqutiginnittoqartigalunilu tapersersorneqartigimmat. Illoqarfiit nunaqarfiillu arlallit innuttaasunut pitsaasunik sammisassarpassuaqartitsinikkut ukioq manna qulequtaq “Inuunermi aallartilluarneq” malunnartinniarlugu aalajangersimapput. Neriuppunga peqataasorpassuaqassasoq oqallilluartoqarlunilu, taama Naalakkersuisoq Martha Abelsen oqarpoq imalu nangilluni:

- Angajoqqaatut meeqqatta peroriartornissamut peqqissunngornissamullu pitsaanerpaanik periarfissaqarnissaat akisussaaffigaarput. Taamaaliortarpugut ilaatigut naartunermi, milutsitsinermi mikisunillu meeraqarluni ilaqutariittut inuunermi imigassartunnginnikkut. Qujanartumik tamanna ilaqutariinnut meerartalinnut amerlanerpaanut pissusissamisoorpoq. Ilaqutariit ajornartorsiortitsisumik imigassamik atuisut imertarunnaarnissaannut tapersersussavavut. Taamaattumik ilaqutariinnut pitsaasunik neqeroortarnissarput ilungersuutigivarput.


Ullumikkut ilaqutariinnut imigassamik pinngitsuuisinnaajunnaarnissamut ikiorneqartariaqartunut neqeroorutit arlaqarput. Ilaqutariit Siusissukkut Iliuuseqarneq aamma Allorfik, akeqanngitsumik katsorsaanissamik innuttaasunut neqerooruteqartartut, aqqutigalugit ikiorserneqarsinnaapput. MANU angajoqqaanngornissamut piareersarneq naartusunut ilaqutariinnullu mikisunik meerartalinnut imigassamik ikiaroornartumilluunniit ajornartorsiutaasumik atuisunut immikkut neqeroorummik ineriartortitsisimavoq.

Innuttaasut peqqissuunissaannik suliniummi Inuuneritta II-mi meeqqat inuusuttullu atornerluilernissaannik pitsaaliuinissamik, inersimasut aalakoortut takussaanerannik killilersimaarinninnissamik sapinngisamillu annerpaamik imigassamik atuinerup annikillisinnissaanik anguniagaq aallaavigalugu Sapaatip-akunnera 18 ingerlanneqarpoq.


Sapaatip-akunnera 18 pillugu uani atuarnerugit: www.peqqik.gl/uge18


Paasisaqarnerujumallutit attavigiuk naalakkersuisup allattaa Inger Heilmann Larsen oqarasuaatikkut.: +299 554160 imaluunniit e-mailikkut: ihla@nanoq.gl