Erninerit pillugit ataatsimiinnerit pissarsiaqarluarnartut

Pingasunngornermi apriilip 24-anni Naalakkersuisup Qeqertalimmi Borgmesteri Ane Hansen ataatsimeeqatigaa, peqqinnissaqarfillu unnukkut innuttaasunik ataatsimiisitsivoq.

Aasiaanni ernisitsinerit juunip aallaqqaataaniit Ilulissanut nuuttussaanerat ataatsimiissutigineqarpoq. WHO-p nunallu avannarliit pitsaassutsimut tunngatillugu piumasaqaataannik maleruaanissamik Kalaallit Nunaata 2003-imi aalajangernera tamatumani tunngaviuvoq.

Borgmesterip Ane Hansenip innuttaasunik ataatsimiisitsinermi eqqaaneqartorpassuarnut assingusunik ernumassuteqarnini oqariartuutigaa aalajangiinerlu kommunip pilersaarutaanut missingersuutaanullu sunniuteqarnerarlugu.

Ernumassutigineqarpoq naartusut amerlanerit erninerup nalaani ilaquttaminnik najorteqannginnissaat.

Neriuutigineqarpoq politikkikkut eqqartorneqassasoq Kalaallit Nunaat WHO-p pitsaassutimut piumasaqaataanik suli maleruaarusunnersoq.

Oqariartuutigineqarpoq ataatsimut isigalugu allannguinernullu atatillugu annerusumik ilisimatitseqatigiittoqartarnissaa kissaatigineqartoq.

Naartusup ilaqutaasullu avissaartinneqarnissaannik ernumassuteqarneq Peqqinnissaqarfiup paasilluarsinnaallugu ernumanartoqartippaa. Taamaattorli Kalaallit Nunaat pitsaassutsinut piumasaqaatinik eqqortitsissasoq Peqqinnissaqarfiup suli tapersersorpaa.

Peqqinnissaqarfik ilisimatitsivoq sulisut pisariaqartinneqartut atorfinitsinnissaat suli sulissutigineqartoq, tassungalu atatillugu paasititsilluni nakorsat peqqissaasullu qanoq ilassineqarnerat najukkamilu kulturimut, pinngortitamut kiisalu atuarfinnut pitsaasunut aamma paaqqinnittarfinnut ilaatilluarneqarnissaat aamma atorfinitsitsiniarnermut ilaasoq.

Naggasiutitut aamma isumaqatigiissutigineqarpoq politikkikkut allaffissornermi malitseqartitsisumik ataatsimiittoqassasoq aamma oqaloqatigiittarneq pitsanngorsarneqassasoq. Martha Abelsen oqarpoq: ”Ernisarnermut tunngatillugu borgmesterip innuttaasullu apeqquterpassui eqqartoratsigit nuannaarutigaara, oqaloqatigiittuarnissarpullu sapinngisannik sulissutigissavara.”

Paasisaqarnerorusukkuit attavigiuk naalakkersuisup allattaa Inger Heilmann Larsen oqarasuaatikkut +299 55 41 60 imaluunniit e-mailikkut: ihla@nanoq.gl.