Kommuneqarfik Sermersuumi heliskiingimut akuersissut pillugu nalunaarut

Tasiilap eqqaani qaqqani alutornartuni heliskiingerneq immikkuullarissuuvoq. Taamaattumik Kommuneqarfik Sermersuumi Tasiilap eqqaani sumiiffimmi heliskiingimut takornariartitsinermik akuersissutip Naalakkersuisut nuannaarutigalugu nalunaarutigisinnaavaat.

 

Tasiilap eqqaani heliskiingimut takornariartitsinermik akuersissummik nalunaaruteqarnermi naatsorsuutigineqarpoq akuersissummik piginnittup takornarianut tunisassiamik qaffassaanissaq pitsanngorsaanissarlu. Tasiilap eqqaani takornarissat siunissami heliskiingerniartut tunisassiamik suli pitsaanerusumik neqeroorfigineqarnissaannik tamanna nassataaqassasoq. Taamaattumik nunap immikkoortuani annertunerusumik siuarsaanermik suliffeqartitsinermillu pilersitsisussanik heliskiingerniarlutik takornarianik misigisaqarusuttunik ilaasulinnik Tasiilap eqqaani qulimiguullit amerlanerusut siunissami takusalernissaat neriuutiginarpoq.

 

”Kommunimi takornariartitsinerup annertunerusumik ineriartortinnissaanik Kommuneqarfik Sermersuup kissaateqarneranik naaperiaasinnaanera nuannaarutigaara, siunissamullu takornariartitsinermik suliarisassat nutaat pillugit kommunilu suleqatigiilluarnissarput qilanaaralugu” Inuussutissarsiornermut Nukissiuuteqarnermullu Naalakkersuisoq Jess Svane oqarpoq.

 

Nunatsinni takornariartitsinerup ineriartortinnissaanut takornariartitsinermik akuersissutit pingaarutilimmik inissisimapput. Sumiiffimmut akuersissut takornarissanut atortussianik pitsaanerusunik aningaasaliinissamut akuersissummik piginnittup pisarialimmik qularnaveeqquserfiunissaa pillugu naatsorsuuteqarnermik tamanna tunngaveqarpoq. Manna tikillugu Qeqqata Kommuniani sukisaarsaatigalugu aalisarnermut akuersissutit arfineq-marluk, aamma tammajuitsussarsiorluni piniarnermut aqqanillit, kiisalu maannakkut Kommuneqarfik Sermersuumi heliskiingimut akuersissut nalunaarutigineqarput.

 

Tamakku saniatigut Qeqqata Kommuniani sisorarnermik takornariartitsinermut akuersissutinut neqerooruteqartitsineq nutaaq tamanut saqqummiunneqarpoq. Nerooruteqartitsineq pillugu annertunerusumik uani atuartoqarsinnaavoq:

Aqqutikitsup aamma Ungalliup Qaqqaasa eqqaanni Sisorarluni takornariartitsineq

 

Paasisaqarnerorusukkaanni attavissaq: Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfik. Email: isiin@nanoq.gl, oqarasuaat +299 34 50 00.