Aaqqissuisoq akisussaasuusoq paasinerluivoq

Aaqqissuisoq akisussaasuusoq Jens Thorin, sapaatip akunnera sinnerlugu Ineqarnermut Attaveqaqatigiinnermullu Naalakkersuisoqarfimmit imaluunniit ataani atsiortumit Namminersorlutik Oqartussat inissiaataanni iluarsartuussinissamut kinguaattoorutit pillugit ilanngutassianut atatillugu apeqqutiminut akissuteqaammik tigusaqarsimanani, ullumi Nunatta Nipaa aallakaatinneqarmat oqarpoq.

Tamatuma saniatigut KNR-ip 23. april ilanngutassiaq qulequtaqartoq ”Namminersorlutik Oqartussat inissianik iluarsartuussinissamut kinguaattooqqaqisut” Radioavisimi, kiisalu KNR-ip nittartagaani saqqummiuppaa. Tassani ilaatigut saqqummiunneqarpoq KNR-ip arlaleriarluni ataani atsiortoq oqaaseqartinniarsarisarsimagaluaraa.

Jens Thorin pisup ingerlanera tamaat pillugu eqqunngitsumik paasissutissinneqarsimasoq ersarippoq, tamannalu tunngavigalugu ullumi Nunatta Nipaani eqqunngilluinnartunik oqaaseqarpoq.

KNR sisamanngorneq ulloq 11. april ullup qeqqata missaani Namminersorlutik Oqartussat inissiaatai pillugit apeqqutinik arlalippassuarnik nassiussivoq. KNR aqagukkut ingerlaannaq oqarasuaatikkut taakkununnga akissuteqarnissaq nukingisaarutigaa, tassani akissuteqaatinik suli nassiussisoqarsimanngimmat ajuusaarnartinneqarluni. Peqatigisaanik KNR paasitinneqarpoq apeqqutit taama amerlatigimmata suliassat suliarineqarnerannut piffissamik atuinissaq naatsorsuutigineqassasoq – tamakkiisumik akissuteqarnissamut suleqatigisanit arlalinnit najoqqutassanik katersineq piffissamik atuiffiusussaammat. Erseqqissarneqassaaq KNR-ip saaffiginnissutaa akissuteqarnissamut piffissamut killiliussamik kissaateqarnermik imaqanngillat, aammalu ataani atsiortumit oqaaseqaammik kissaateqartoqarnersoq allassimanani. Tamatuma saniatigut Inatsisartut inissiaatai unnuisarfiit pillugit paasisaqarnissamik saaffiginnissut imaqarpoq, taamaattumik saaffiginnissut aallaqqaammulli uanga akisussaaffeqarfimma ataaniinngitsutut inissisimalluni.

Apeqqutit assingi amerlasuut taamatuttaaq INI A/S-imut nassiunneqarput, tassani KNR-ip taakkununnga akissuteqaammut ilanngunneqartut ulloq 16. april tigoreerlugit. Apeqqutit allat oqarasuaatikkut ulloq 17. april Naalakkersuisoqarfimmut akissuteqarfiginiarneqarput. Tassunga tunngatillugu oqaatigineqassaaq, tusagassiortup apeqqutinik nassiussisup Naalakkersuisoqarfiup oqarasuaatikkut attaveqarniarsarinera akisimanngimmagu, taamaattumillu akissuteqaat tusagassiortumut allamut tunniunneqarsimalluni. Peqatigisaanik annertunerusumik nukingiuttarialinnik annertuunik suliassaqarnermik pissuteqartumik, sulinngiffeqartoqarneralu – påskilernerani tamatigut naatsorsuutigineqartariaqartartoq - pissutigalugu sulisut tamakkiinnginnerat, ilanngullugu allaganngorlugu akissuteqaammik nassiussisoqarsimanngimmat ajuusaarutigalugu oqaatigineqarpoq. KNR tamatumunnga paasinnittorujuunerarpoq, taamaattorli ullumi Nunatta Nipaani paasinninneq taanna malunnartinneqarani.

Sukkanerusumik suliassanik suliarinninnissamik neqerooruteqarnermut ilaatillugu, –KNR-ip piffissamut suliassanik suliarinniffiusussanut naatsorsuutigisaanut naleqqunnerussasoq neriuutigalugu - Naalakkersuisoqarfimmi atorfilittamut toqqaannartumik attaveqarnissamik, oqarasuaatikkut oqaloqatigiinnermi tassani KNR neqeroorfigineqarpoq. KNR taamatuttaaq Naalakkersuisoqarfimmi ataatsimiinnissamut qaaqquneqarpoq, tassani ineqarnermut suliassaqarfik nalinginnaasumik qulequtarineqassalluni, peqatigisaanillu KNR apeqquteqarnissamut periarfissaqassalluni. Taamatut neqerooruteqarneq KNR-ip maannamut atorluarniarlugu toqqarsimanngilaa.

Naggasiutigalugu oqaatigineqassaaq KNR-ip ulloq 23. apriili iluarsartuussinissamut kinguaattoorutinut tunngatillugu ilanngutassiaa paasissutissanik oqaaseqaatinillu eqqunngitsorujussuarnik arlalinnik imaqarmat, taamaattumillu atuartussaq pissusiviusunik eqqortunik paasitinneqarani. KNR-ip taamaaliornermini tusagassiortutut pisussaaffimminik naammassinninnginnera aammalu tamanut eqqortumik aammalu pissusiviusunik aallaaveqartunik paasissutissiinnginnera isumanerlunnartoqartorujussuuvoq. Peqatigisaanik qulequtaq pillugu ilanngutassiamik suliaqarnermut atugassatut, ineqarnermut suliassaqarfimmut paasissutissat pillugit Naalakkersuisoqarfiup neqeroorutai saqqummiunneqartut, KNR-ip atunngimmagit tamanna isumanerlunnarpoq.


Inussiarnersumik inuulluaqqusillunga

Karl Frederik Danielsen