Laarseeraq Skiftemut eqqaaniut

Assut aliasuutigisannik Laarseeraq Skiftep tassanngaannartumik toqusimanerata nalunaarutigineqarnera tusarpara.

Laarseeqqap assut tunniusimasuunera, ilaatigut timersornernik aaqqissuussinernut, nuannaartorinartuuvoq.
Laarseeraq Nersornaat sølvimik 2010-mi timersornermik nersortarialimmik suliaqartarnerminut nersornaaserneqarpoq.

Arctic Circle Racep aallartinneqarneranut annertuumik suleqataasimavoq. Unammissut nunarsuarmi ilisimaneqarlualernikuusoq nunatsinni tamatta tulluusimaarutigisatsinnik ingerlanneqartartoq. Sisorarneq immikkuullarissumik nuannersortalik inuillu naapisimaartarfiat taassuma pilersissimasaa Laarseeqqamut qujassutissaavoq.

Laarseeqqap aamma sammisassat allat, uagut kinguaassattalu sammisarisinnaasaat, pilersitseqataaffigalugillu siuarsaaqataaffigai. Illiniliuuppaatigut, uagullu illerngit taakku atorluarlugillu inerisassavagut, inuttaa eqqaaniarlugu.

Laarseeraq ukiorpassuarni timersornermut sullissisimaneranut nunatsinnillu nunarsuarmiunik ilisimasaqalersitsiniarluni annertuumik suliaqarsimaneranut ataqqilluinnarlugu qujaniarfigalugulu eqqaaniartassavarput.

Naalakkersuisut sinnerlugit Laarseeqqap nulia, qitornai ilaqutaalu misiginneqatigaakka.

Laarseeqqap eqqaaneqarnera ataqqinartuuli.

Naalakkersuisut sinnerlugit, Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq.


Ane Lone Bagger