Ilaqutariit paarsisartut piginnaanngorsarneqarnissaat pingaaruteqarpoq

Meerarpassuit ullumikkut ilaqutariinni paarsisartuni najugaqarput. Ilaqutariit ilaqutariit paarsisartutut suliassamik tigusisut taamatut pingaaruteqartigisumik suliaqarnissaminnut pitsaanerpaanik atugassaqartitaassapput.

Meeqqat tapersersorneqarnissaannut inatsimmi 2017-imi akuerineqartumi arlalinnik pitsanngorsaasoqarsimavoq, ilaatigut ilaqutariinnut paarsisartunut inatsisitigut piumasaqaataasumik pikkorissarnerit. Tamanna tunngavigalugu Isumaginninnermut Aqutsisoqarfimmi Fairstartimik ilaqutariit paarsisartut piginnaanngorsarneqarnissaat pillugit suleqateqartoqalersimavoq. Fairstartimik suleqateqarneq atuarfinnik, meeqqat angerlarsimaffiinik atuartut aamma ulloq unnuarlu paaqqinniffinnik saaffigisaqarluni suliaqareernermik nangitsineruvoq.

Ilinniartitaanissaq pillugu ima aaqqissuussaassaaq ilaqutariinnik paarsisartunik ilitsersuisut arlallit ilinniartinneqassapput, taakkulu najukkani ilaqutariinnik paarsisartunik piginnaanngorsaanissamut ilinniartitaassapput. Ilitsersuisunngorumaartussat sulisuussapput meeqqanik inuusuttuaqqanillu isumassuinernik ilisimasallit soqutigisallillu. Ilitsersuisutut ilinniakkaminnik naammassinnittut inatsisit naapertorlugit ilinniakkamik isumaginninnissaminnut piginnaanngorsarneqassapput ilaqutariinnillu paarsisartunik piginnaanngorsaassallutik.

Ilaqutariit paarsisartut inuussutissarsiutigalugu isumassuisinnaanerannik piginnaanngorsarnerisigut meeqqat ilaqutariinni paarsisartuni toqqissisimallutik peroriartornissaat anguniagaavoq, taamaalillutik ilaqutariit paarsisartut najukkani piginnaanngorsarneqassapput meeqqallu angerlarsimaffiup avataanut inissinneqartartut ikilisinneqarlutik.

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq:

”Suliniutip taassuma aallartinneqarsimanera aamma najukkani ilitsersuisut atorlugit ilaqutariit paarsisartut piginnaanngorsarlugit periuseqarnerput nuannaarutigisorujussuuara. Taamaaliornikkut periuseq piujuartoq uatsinnut kommuninullu siunnersortinik pisariaarutsitsisoq qulakkiissavarput”


Ilinniartitaaneq suliassaqarfimmi inatsimmut naapertuuppoq aammalu Meeqqat tapersersorneqarnissaat Inatsisartut inatsisaat nr. 20, 26. juni 2017-imeersumi aamma Ilaqutariit paarsisartut pillugit Namminersorlutik Oqartussat nalunaarutaat nr. 17, 8. novembari 2017-imeersumi piumasaqaatit malinneqarput.

Ilinniartut siulliit ukiamut aallartissapput.

Paasisaqarnerorusukkuit naalakkersuisup allattaa Inger Heilmann Larsen e-mail: ihla@nanoq.gl imaluunniit oqa. +299 554160 aqqutigalugu attavigiuk