Nunat Avannarliit Siunnersuisoqatigiiffiata 2019-imut avatangiisit pillugit nersornaasiuttagaannut qinigassat siunnersuutigikkit

Piujuartitsisumik atuinerup nioqqutissiornerullu siuarsarnissaanut suliniutit Nunat Avannarliit Siunnersuisoqatigiiffiata avatangiisit pillugit nersornaasiuttagaanni ukioq manna sammineqarput. Atuinikinnerunermut suli annerusumik pitsaanerusumillu suliaqartariaqarpugut.

Kikkut tamarmik qinigassanik siunnersuuteqaqataasinnaapput.

Nunani avannarlerni inuussutissarsiutigalugu suliffeqarfimmut, aaqqissuussamik suleqatigiiffimmut inummulluunniit suliniuteqarnikkut avatangiisinut soqutigisaqarluni maligassiuisumik ilanngussisinnaasimasumut imaluunniit allatigut avatangiisinut immikkut suliniuteqarsimasumut avatangiisit pillugit nersornaasiineq tunniunneqartarpoq.

Piujuartitsisumik atuinerup nioqqutissiornerullu siuarsarnissaanut naammassisaqarluarnerunikkut pitsaanerusumillu suliniuteqartumik inuussutissarsiutigalugu suliffeqarfimmik, aaqqissuussamik suleqatigiiffimmik inummilluunniit nalunngisaqarpit? Nersornaammut akimasumut qinigassanngortikkusutavit siunnersuutiginissaanut maannakkut periarfissaqarputit. Nersornaasikkatut akissarsisitaq imaluunniit akissarsisitat Nunanut Avannarlernut attuumassuteqassapput Nunanilu Avannarlerni suliaqassaaq aamma/imaluunniit Nunat Avannarliit avataannut peqataasunut attuumassuteqarluni.

Siunnersuuteqarnermut immersugassap www.norden.org. -miittup immersorneratigut siunnersuuteqarsinnaavutit. Tunngavilersuut annerpaamik qupperneq A4 ilanngunneqassaaq.

Qinigassanik siunnersuuteqarnissaq ulloq 15. maaji 2019-imut piffissalerneqarpoq.

Nunat Avannarliit Siunnersuisoqatigiiffiata Avatangiisit pillugit nersornaasiuttagaannut siunnersuutigineqartut septembarimi tamanut saqqummiunneqassapput, aamma Stockholmimi ullormi 29. oktober 2019-imi Nunat Avannarliit Siunnersuisoqatigiiffiat nersornaammik tunniussissaaq, nersornaat 25-ssaanik tunniunneqassaaq ajugaasorlu 350.000 kr.-inik pissarsissaaq.

Immammi avatangiisit misissuinermi paasisaat aamma aqutsinermut suliniutissatut siunnersuutaat pillugit Attumi Pinngortitami isumalluutit pillugit siunnersuisoqatigiinnut 2018-imi Nunat Avannarliit Siunnersuisoqatigiiffiata Avatangiisit pillugit nersornaasiuttagaa tunniunneqarpoq.

Paasissutissanut amerlanerusunut, takuuk www.norden.org imaluunniit Pinngortitamut, Avatangiisinut Ilisimatusarnermullu Naalakkersuisoqarfik attaveqarfigiuk: pan@nanoq.gl. Oqa.: 345000.