Pele Broberg-ip sermitsiaq.AG-mi oqaaseqaataanut naqqiut

Sermitsiaq.AG-p nittartakkakkut tusagassiorfiata 9. apriili 2019-imi oqaluttuaq ”Pele kamappoq: Mittarfiit pillugit paasissutissaq pingaarutilik kalerriutigineqanngilaq” saqqummiuppaa.

Allaaserisami Pele Broberg imatut issuarneqarpoq: ”Mittarfiliortiternissamut pilersaarummi Kangerlussuup matuneqarnissaa piumasaqaataanikuuvoq. Mittarfiup ammatinneqarnissaa maanna pisussaaffiginiarneqarpasilerpoq”.

Taamatut oqarnera ilumuunngilaq.

Nuummi aamma Ilulissani nunanit tamalaanit mittarfiit kiisalu Qaqortumi nunap immikkoortuani mittarfiup sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit Inatsisartut
inatsisaannut nr. 4, 22. november 2018-imeersumut nassuiaatinik issuaalaariarlanga:

“Kangerlussuup aamma Narsarsuup atorneqaannarnerisa annertussusaa sunniutaasussallu suleqatigiissitaliani marlunni Namminersorlutik Oqartussanit, Qeqqata Kommunianit aamma Kommune Kujallermit ilaasortaaffigineqartuni,
qulaajaavigineqassaaq. Kangerlussuarmi aamma Narsarsuarmi mittarfiit siunissami atorneqarnissaannut ingerlanneqarnissaannullu pilersaarummik inaarutaasumik innersuussinissaq, siunnersuutip matuma avataani inissisimavoq.”

Taamaattumik erseqqissaqqissavara, Kangerlussuup siunissaa, tassungalu ilanngullugit matuneqarnissaa, allineqarnissaa aserfallatsaalineqarnissaaluunniit pillugit aalajangiisoqarnikuunngimmat.

Naatsorsukkat, inatsisip aningaasaqarnermut kingunerisassaanut tunngaviliisut erseqqissumik takutippaat: Mittarfiliortiternermi ineriartortitsinissaq pissaaq attaveqaqatigiinnerup nutaamik aaqqissuussaaneranut aningaasaliinikkut, massakkutut pissutsinik atuutsitsiinnarnikkut pissanngilaq. Tamanna periarfissatut ilusiliaq 1-imi aamma 2-mi naatsorsuinermut assersuusiat arlallit aqqutigalugit takutinneqarpoq.

Kangerlussuup siunissaa pillugu kommunilu suleqatigiinnissamik isumaqatigiissutigiissutip saniatigut maanna Illersornissaqarfik Kangerlussuarmiiginnarnissamik kissaateqarnerannik misissuinissaq pillugu danskit
naalakkersuisuisa suleqatigineqarnissaat aalajangiunneqarpoq.

Mittarfinnut nutaanut aalajangiinissamut tunngaviusut allanngorluinnarsimanerinik oqarneq suliap tamarmiusup pisariussusianik sangutitsiniarneruvoq, innuttaasunut uupakaatitsiniarnertut isikkoqangajalluni.

Inussiarnersumik inuulluaqqusillunga

Karl Frederik Danielsen

Annertunerusumik paasisaqarusukkuit Naalakkersuisup allattaa Steve Sandgreen stes@nanoq.gl imaluunniit +299 596659 aqqutigalugit attaveqarfigisinnaavat.