Maniitsumi Sisimiunilu ataasinngorpat nipisanniartoqalissaaq

Aqutsiveqarfinni Maniitsumi Sisimiunilu, NAFO 1C-mi aamma 1Bb-mi, nipisanniarneq ataasinngorpat apriilip 15-ianni aallartissaaq.

Nipisat suaat 1C-mut ukioq manna pisassiissutigineqartut 310 tonsiupput, 1 Bb-mut 54 tonsiullutik.

1C-mi 1Bb-milu nipisanniarneq kingulleq tassaassaaq maajip 28-at, pisassiissutigineqartut tamakkerlugit siusinnerusukkut aalisarneqarsimanngippata. Taamaattoqassappat, tamanna pillugu nalunaaruteqartoqarumaarpoq.

Aqutsiveqarfimmi aalisartoqarunnaarpat pisassiissutillu sinneqarsimappata, taakku aqutsiveqarfiup tullianut nuunneqassapput.

Nunatta Kitaani nipisat suaat ukioq manna pisassiissutigineqartut 1.300 tonsiupput, aqutsiveqarfinni arfineq-marluusuni aalisarneqarsinnaallutik.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi AC-fuldmægtig John Biilmann. E-mail: johb@nanoq.gl