Kalaallit meerartaasa Danmarkimut nuunneqarsimaneri pillugit misissuineq aallartinneqarpoq

Kalaallit meerartaasa 22-usut 1951-imi Danmarkiliartinneqarnerat pillugu, tamatumalu kingorna meeqqat pineqartut amerlanersaasa Nuummi børnehjemmimut inissinneqarsimanerat pillugu oqaluttuarisaanermut tunngasumik qulaajaasoqarnissaanut suliassap nassuiarneqarnera ullumikkut tamanut saqqummiunneqarpoq.

Suliniut 1951-imi kalaallit meerartaannik 22-usunik Danmarkimut nassiussinermik kinguneqartoq qulaajaanerup paasiuminarsisissavaa. Oqaatsit marluk tunngavigalugit nutaamik atuarfeqarnermik aaqqissuussinissamik siunertaqartumik pilersitsinissamut tunngaviliinissaq siunertarineqarsimavoq, kisiannili ingerlatsineq tamanna meeqqanut ilaqutaannullu inuttut annertuunik kinguneqarsimavoq.

Børne- og socialminister Mai Mercado aamma Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen, ataatsimoorlutik suliassap nassuiarneqarneranik suliaqarsimapput, taannalu oqaluttuarisaanermut tunngasunik atituumik qulaajaanissamut sinaakkusiivoq.

Oqaluttuarisaaneq tunngavigalugu isiginniffiit, aalajangiisoqarnissaanut ingerlatsisimaneq, meeqqat inuunerminni atugarisaat aamma inunnut ataasiakkaanut tamaaliortoqarnerata kingunerisaasa misissorneqarnissaat qallunaat kalaallillu tungaannit qilanaarineqarpoq.

Oqaluttuarisaaneq tunngavigalugu suliamik ilisimasallit arlallit ukiumi tullermi qulaajaanermik isumaginnittuussapput. Piffissami qaninnerpaami suliamik ilisimasallit toqqarneqarnissaat naatsorsuutigineqarpoq.

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen ima oqaaseqarpoq:

“Oqaluttuarisaanermi pisimasut taamatut ittut nassuiarneqarnissaat pingaaruteqarpoq. Pereersut allanngortissinnaanngilagut, kisiannili meeqqat pineqartut, taakkulu ilaqutaat nalinginnaasumillu inuiaqatigiit eqqarsaatigalugit, taava suliami pisimasut assigiinngitsut paasissallugit pingaaruteqarpoq, taamaalilluta qanoq pisoqarpiarsimanersoq paasiniassagatsigu. Suliap naggaserneqarnissaa qilanaaraara. Meeqqat pineqartut inuiaallu kalaallit pillugit taamaaliortariaqarpugut.”


Børne- og socialminister Mai Mercado ima oqaaseqarpoq:

“Meeqqat ilaqutaasullu atorsimasaat tusaallugit misigisaavoq sakkortooq. Naak siunertarineqartut pitsaagaluartut, taamaattoq ingerlatsisimaneq meeqqanut amerlasuunut annertuumik ajortumik kinguneqarsimammat qularutissaanngilaq. Ullumikkut qanga pisimasut paasissaanngitsutut ipput. Kisianni qanorluunniit kissaatigitigigaluarukku allanngortissinnaanngilakka. Taamanikkut aalajangiinerit sunik tunngaveqarsimanersut paasinarsisinneqartussanngormata nuannaarutigaara. Kina pisuusimanersoq uani pineqanngilaq, kisiannili tamattaalluta oqaluttuarisaaneq ataatsimoorussarput pillugu ilisimasaqarnerulernissarput pineqarpoq, taamaalilluta ataatsimoorluta qanga pisimasut isigisinnaalerniassagatsigit. Inunnut suliami uani kalluarneqarsimasunut tamanna aamma pingaaruteqassasoq isumaqarpunga.”

Oqaluttuarisaaneq tunngavigalugu qulaajaaneq qallunaat naalakkersuisuinut Naalakkersuisunullu kingusinnerpaamik 1. Juni 2020 tunniunneqassaaq, tamatumalu kingorna tamanut saqqummiunneqarnissaa siunertarineqarpoq.


Suliassap nassuiarneqarnera uani atuaruk


Paasissutissat allat
Danmarkimi
Fuldmægtig Bjarke Stensgaard Nielsen, bjsn@sm.dk, tlf.: 41 85 10 56
Pressemedarbejder Andreas Hald, ahal@sm.dk, tlf.: 41 85 12 66

Kalaallit Nunaat
Ministerip allattaa Inger Heilmann Larsen, ihla@nanoq.gl imaluunniit tlf. + 299 554160