Aalisarneq pillugu Ataatsimiititaliarsuaq siullermeerluni ataatsimiippoq

Ullormi 9. april 2019 Aalisarnermut Ataatsimiititaliarsuaq siullermeerluni Nuummi Hotel Hans Egede-mi ataatsimiippoq.

Siullermeerluni ataatsimiittoqarnerani Aalisarnermut Ataatsimiititaliarsuup sulinissaanut tunngavissat erseqqinnerusut aalajangersaaffigineqarput. Sulinissamut tunngavissaq oqallisigineqarpoq, soorlu Aalisarnermut Ataatsimiititaliarsuup sulinissanut anguniagassat tunngavigineqartussallu kiisalu suliassat suliakkiutaasut angusassatullu naatsorsuutigisat.

Ataatsimiititaliarsuaq aalisarneq pillugu inatsisip misissuiffiginissaanut siunnersuutinik suliaqaqqullugu peqquneqarsimavoq, siunnersuutit aalisarnermi ineriartornissamut periarfissat pitsaanerulernissaannut iluaqutaasinnaasut pillugit aamma inuiaqatigiit aalisarnermik inuussutissarsiuteqarnermik pisuussutinillu annerpaamik iluaquteqalernissaat anguniarlugu.

Aalisarnermut Ataatsimiititaliarsuup siulittaasua, Eqqartuussissuserisoq Jens Paulsen, siullermik ataatsimiinnermi ima oqaaseqarpoq:
”Siullermeerluni ataatsimiinneq ajunngitsumik anersaaqarluni ingerlanneqartoq naammagisimaaqaara. Nuannaaqaanga sulilluta aallartikkatta, siullermillu ataatsimiinneq isumalluarnarpoq Aalisarnermut Ataatsimiititaliarsuup suliaminik naammassinninniarnissaanut."

Ataatsimiititaliarsuaq aamma suleriaasissamik sammisassallu suliarinissaannut piffissaliunneqarallartumik akuersissuteqarpoq, sammisassallu taakku isumaliutissiissummut ataatsimiititaliarsuup 2020-mi juunimi sulineranut naammassineqartussamut tunngavittut atorneqassapput.

Aalisarnermut Ataatsimiititaliarsuarmi siulittaasup tullia, Professor Emeritus Peder Andersen, kimulluunniit attuumassuteqarnatik ataatsimiititaliarsuarmi ilaasortaasup aappaa, imannak oqarpoq: "Suliassaq annertooq imaannaanngitsorlu aallartissimagipput ilisimaneqarpoq, taamaattorli sulinissatsinnut tunngavissavut aalajangerneqareerput, aallartilluareerpugullu."


Paasissutissanik matumani taaneqanngitsunik allanik pissarserusuttoqarpat Aalisarnermut Ataatsimiititaliarsuup siulittaasuanut, Jens Paulsen, jp@alg.gl imaluunniit oqarasuaat 322252 aqqutigalugit saaffiginnittoqarsinnaavoq.