Naalakkersuisuni allannguutit

Partii Atassut ulloq 8. april 2019-imi nalunaaruteqarpoq Naalakkersuisunit aninissaq kissaatigigini. Tamatuma malitsigisaanik Naalakkersuisut siulittaasuat aalajangerpoq Pinngortitamut, Avatangiisinut Ilisimatusarnermullu Naalakkersuisoq Siverth K. Heilmann aamma Inuussutissarsiornermut Nukissiuuteqarnermullu Naalakkersuisoq Aqqalu Jerimiassen Naalakkersuisuni ilaasortaajunnaarsinniarlugit.

 

Aalisarnermut, Piniarnermut Nunalerinermullu Naalakkersuisup Nikkulaat Jeremiassen-ip, Siumut, Naalakkersuisut siulittaasuannut nalunaaruteqarpoq Naalakkersuisuujunnaarnissani kissaatigalugu. Naalakkersuisut siulittaasuat aalajangerpoq Nikkulaat Jeremiassen-ip kissaataa akueriniarlugu, taamaalilluninilu Nikkulaat Jeremiassen Naalakkersuisuni ilaasortaajunnaarpoq.

 

Siverth K. Heilmann-ip Naalakkersuisuujunnaarnerata malitsigisaanik Pinngortitamut, Avatangiisinut Ilisimatusarnermullu naalakkersuisoqarfimmi akisussaaffik Naalakkersuisut siulittaasuannit naalakkersuinikkut akisussaaffigineqarallassaaq.

 

Aqqalu Jerimiassen-ip Naalakkersuisuujunnaarnerata malitsigisaanik Inuussutissarsiornermut Nukissiuuteqarnermullu naalakkersuisoqarfimmi akisussaaffik Ineqarnermut Attaveqaqatigiinnermullu Naalakkersuisumit Karl Frederik Danielsen-imit, Siumut, naalakkersuinikkut akisussaaffigineqarallassaaq.

 

Nikkulaat Jeremiassen-ip Naalakkersuisuujunnaarnerata malitsigisaanik Aalisarnermut, Piniarnermut Nunalerinermullu naalakkersuisoqarfik Aatsitassanut Suliffeqarnermullu Naalakkersuisumit Erik Jensen-imit, Siumut, tigummineqarallassaaq.