Qeqertarsuup Tunuani ernisussanut sullissineq pillugu Partii Naleraq eqqunngitsumik oqariartuuteqarpoq

Naalakkersuisoq for Finans og Indenrigsanliggender Vittus Qujaukitsoq Sermitsiaq.AG-p nittartakkakkut quppernerani ulloq 3. april 2019 Partii Naleqqap tusagassiuutinut nalunaarutaa issuaavigineqarpoq, tassanilu Jens Napaattuup uanga Aningaasaqarnermut Naalakkersuisutut 2019-mut aningaasanut inatsimmut atatillugu Inuit Ataqatigiit Aasianni ernisarfimmik matusinissamik akuersisillugit uukapaatissimagikkaa pasitsassaarutigaa.

Jens Napaattooq nammineq ilisimariikkani killormut saatillugit oqaluppoq.

Qeqertarsuup Tunuani piffissami sivisuumi nakorsanik aalajangersimasumik atorfeqartussanik sulisussarsiniarneq annertuumik ajornartorsiutigineqarpoq, tassani nakorsat pilattaallutik ernisitsisarnermik immikkut piginnaasallit aanaarnernillu passussisinnaasut kiisalu peqqissaasut sinitsitsinermik immikkut ilisimasaqartut. Immikkut ilinniarluarsimasunik amigaateqarneq taartaagallartunik atorfinitsitsinikkut aaqqiivigineqarsinnaanngitsoq peqqinnissaqarfik naliliivoq. Taamaammat Naalakkersuisut ulloq 30. oktober 2018-imi aaqqiigallarneq akueraat, tamatumalu kingorna aalaakkaasumik sulisut pisariaqartinneqartut atorfinitsinnissaasa tungaannut, ernisussat Qeqertarsuup Tunuaneersut Ilulissani Nuummiluunniit ernisussanngorput. Taamaalilluni aalajangerneq tamanna naartusut meerassaasalu isumannaatsuunissaat kisiat tunngavigalugu pivoq. Aaqqiigallarneq taanna ukiup ataatsip qaangiunnerani nalilerneqassaaq.

Naalakkersuisut aalajangernermut tunngaviata assilineranik Inatsisartut Ilaqutariinnermut Peqqissutsimullu Ataatsimiititaliaat tigusaqarpoq.

Taamaattaarlu tusagassiuutinut nalunaartut, Peqqissutsimut Naalakkersuisoqarfiup ulloq 1. november 2018-imi nassiussaatigut tamanna tamanut ilisimatitsissutigineqarpoq.

Aaqqiigallarneq aningaasartuuteqarnerunermik – tassa sipaaruteqannginnermik! – nassataqarmat, aalajangerneq 2019-imut Aningaasanut Inatsimmut ilaatigut atuinermut, ullormusianut angallassinernullu 1,7 mio. kr.-nik sunniuteqarpoq. Aningaasartuutaanerusoq taanna 2019-imut aningaasanut inatsit pillugu isumaqatigiissummut tunngaviusuni politikikkut isumaqatiginninniarnerni ilaatinneqanngilaq. Tamatuma kingorna aningaasartuutaanerusut Aningaasanut Inatsimmut inatsisissatut siunnersuutip pingajussaaneerneqarnerani allannguutissatut siunnersuutikkut ilanngunneqarput.

Aningaasaqarnermut Akileraartarnermullu Ataatsimiititaliap ilassutitut isumaliutissiissummini allannguutissatut siunnersuut tamanna erseqqilluinnartumik eqqartorpaa, ataatsimiititaliarmi ilaatigut ima allappoq:
”. 20 19-imi konto pingaarnermi 34.12.01 Peqqinnissaqarfiit, nakorsanit sullinneqarneq 1,7 mio. kr.-nik immikkoortitsisoqarnissaanik allannguutissatut siunnersuummik saqqummiussisoqarpoq, tamannalu Nunap immikkoortuani Qeqertarsuup Tunuani Aasianni ulloq 1. februar 2019 aallarnerfigalugu erninissamut periarfissat atorunnaarsikkallarnerata kingunerisaanik pivoq. Tamatumani peqqinnissamik sulisunik naapertuuttunik ilinniagalinnik amigaateqarneq patsisaavoq. Ernisussat utaqqiisaagallartumik Nunap immikkoortuani Avannaani Ilulissanut nuunneqarallassapput. Suliniut piffissalingaanngitsumi atuukkallassaaq sulisussanillu naapertuuttumik ilinniagalinnik sulisussaqalernikkut tigumminniinnarsinnaalernissamullu utaqqiisaagallartumillu aaqqiinerulluni, tamannalu Naalakkersuisut sulissutigissallugu aalajangiuppaat. Taamaammallu aningaasaliissutit 2019-imi suliniutinut ilassutaagallartuupput.”

Ataatsimiititaliami amerlanerussuteqartut aningaasanut inatsimmi partiit akisussaasunit Siumumit, Demokraatinit Inuit Ataqatigiinneersunillu allannguutissatut siunnersuutip akuersissutigineqarnissaa inassutigaat. Partii Naleqqap ataatsimiititaliami sinniisaa – Jens Napaattooq – isumaliutissiissummi inassuteqaammik, akerliliinermik aallatigulluunniit oqariartuummik saqqummiussinngilaq.

Taamaammat Jens Napaattuup maanna allatut ajornartumik pisariaqavissumik Aasianni
Ernisinnaanermik periarfissap ajoraluartumik atorunnaarsikkallarnerani peqataasut uukapaatillugit akuersisinneqarsimaneraanera sakkortuumik uukapaatitsiniarnertut taaneqartariaqarpoq. Piviusoq tassaavoq Naalakkersuisut aalajangernermi uani ammasumik pissusilersormata.

Inussiarnersumik inuulluaqqusillunga

Vittus Qujaukitsoq, Aningaasaqarnermut Nunanilu Avannarlerni Suleqatigiinnermut Naalakkersuisoq

Attavissaq: Naalakkersuisup allattaa Rosa Thorsen, tlf. 55 33 03 imaluunniit mail rosap@nanoq.gl