Pisortanit ikiorsiissutit pillugit aaqqissuusseqqinnissamut piareersarnerit suliassaqarfik pillugu misissuinerup annertuup inernerata saqqummiunneratigut aallartinneqarput

Det Nationale Forskningscenter for Forskning- og Analyse af Velfærd Isumaginninnermut Naalakkersuisoqarfiup suliassiissutaa tunngavigalugu pisortanit ikiorsiissutit pillugit misissuisimapput. Nalunaarusiaq maanna tamanut saqqummiunneqarpoq, taannalu pisortanit ikiorsiissutit aaqqissuuteqqinneqarnerannut piareersaatinik suliaqarnermut ilaassaaq.

Pisortanit ikiorsiissutit aaqqissugaanerat unammilligassarpassuaqarlunilu amigaateqartoq qangali ilisimaneqarpoq. Pisortanit ikiorsiissutit pillugit peqqussut ukiorpassuarni allanngortitsilaartarnerit eqqaassanngikkaanni allanngorsimanngilaq, taamaattumillu maanna sukumiisumik nutarterneqarnissaa pisariaqalerpoq, tamanna aamma Akileraartarnermut Atugarissaarnermullu Isumalioqatigiissitamit assigisaannillu uparuarneqarsimavoq.

Tamanna tunngavigalugu, aamma pisortanit ikiorsiissutit pillugit aaqqissuusseqqittoqarnissaa politikkikkut siammasissumik kissaatigineqarnera tunngavigalugu Isumaginninnermut Inatsisinullu atuutsitsinermut Naalakkersuisoqarfiup 2017-imi Det Nationale Forsknings- og Analysecenter for Velfærd (VIVE) pisortanit ikiorsiissutit pillugit aaqqissuussaanerup unammilligassartai pillugit sukumiisumik misissueqqullugu qinnuigisimavaa. VIVE-p nalunaarusiaa maanna tamanut saqqummiunneqarnissamut piareerpoq. Nalunaarusiap aaqqissuusseqqinnissamut piareersaatinik suliaqarnermi tunngaviunissaa tamatumunnga siunertaavoq, aaqqissuusseqqinnissarlu ilaatigut kommunit, suliffeqarnermi peqataasut kiisalu naalakkersuisoqarfiit attuumassuteqartut peqatigalugit suliarineqassaaq.

Misissuinermit paasisat soqutiginaatillit arlaqarput, ilaatigut

- amerlavallaat inuunerminni suliffeqarnikkullu ingerlariaqqinnissaminnut naammattumik ikiorserneqarneq ajorput, taamaammallu pisortanit ikiorsiissutini aaqqissuussaanermit ingerlariaqqinnaveeqqasarlutik
- inuusuttut amerlavallaat ilinniagaqarnatik suliffeqarnatilluunniit pisortanit ikiorsiissutinik pisartagarput, taakkulu ilitsersorneqarnissaminnik kajumissaarneqarnissaminnillu amigaateqarput,
- ilaatigut pisuni pisortanit ikiorsiissutinik pisartagaqartut sulileraangata annikinnerusumik isertitaqalersarnerannik kinguneqartarpoq.

Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq: ”Aaqqissuusseqqinnissamik suliaqarnissami tunngavissat ilaatigut inuiaqatigiinni sanngiinnerpaat inuiaqatigiinnut peqataaleqqinnissaat anguniarlugu ikiuisarnermik suliniutit patajaallisarnissaat, inuusuttut ilinniarnissamut sulilernissamullu ilitsersorneqarnissaat, aamma sulinerup taamaalillunilu uninngaannarluni pilersorneqarnermit pilerinarnerulertinnissaa ilagissavaat. Taamaattumik kommunit suliffeqarfiillu peqatigalugit aaqqissuusseqqinnermik suliaqarnissara assut qilanaaraara”.

Pisortanit ikiorsiissutit pillugit aaqqissuusseqqinnernik suliaqarneq ataatsimut aaqqissuusseqqinnermut “Annertunerusumik imminut pilersorneq” pillugu suliamut – suliffeqarnermut, isumaginninnermut, akileraartarnermut aamma ilinniartitaanermut suliassaqarfinni aaqqissuusseqqinnernut attuumassuteqarput.

Attavissaq
Paasisaqarnerorusukkuit attavigiuk naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqarasuaatikkut +299 554160