Tunngaviusumik Inatsisissaq pillugu Isumalioqatigiissitap Suliakkiissutinut najoqqutassiassaa tamanut saqqummiunneqarpoq

Tunngaviusumik Inatsisissaq pillugu Isumalioqatigiissitap inissinnissaanut Suliakkiissutinut najoqqutassiaa tamanut saqqummiunneqarpoq, taamaalillunilu Isumalioqatigiissitaajumaartussat Tunngaviusumik Inatsisissamik allaqqitassiaasumik najoqqutaqarlutik sulillutik aallartissinnaanngorput.

”Nuannaarutigaara, Tunngaviusumik Inatsisissaq pillugu Isumalioqatigiissitaq maanna sulilluni aallartissinnaanngormat. Sulinissamut tunngavissaq Suliakkiissutinut najoqqutassiaq suliarilluagaavoq, taassuma qulakkiissavaa Isumalioqatigiissitap pilersinneqartup qulequttanik pineqartumut attuumassutilinnik itisilerinissaminnut pitsaasumik periarfissinneqarnermikkut Tunngaviusumik Inatsisissamik allaqqitassiaasumik suliaqartussanngornerat. Illuatungaatigullu aamma taama pingaartigaaq, innuttaasut piffissaqarluartillugit akuutinneqassammata tamat oqartussaaqataanerisa aqqani”. Taama iluarisimaarinnilluni Aningaasaqarnermut Nunanilu Avannarlerni suleqatigiinnermut Naalakkersuisoq Vittus Qujaukitsoq oqarpoq, nangipporlu:

”Suliakkiissutinut najoqqutassiaq aamma periarfissiivoq, Isumalioqatigiissitaq immikkut ilisimasalinnik aammalu ad hoc-mik tunngavilinnik qulequttanut immikkut ittunut pingaarutilinnullu erseqqissaasinnaasunik aggersaasoqarsinnaaneranik”.

Tunngaviusumik Inatsisissaq pillugu Isumalioqatigiissitap suliassaraa, Tunngaviusumik Inatsisissamik allaqqitassiaasumik suliaqassalluni. Allaqqitassiarlu naammassineqarpat innuttaasut akornanni oqallisigineqassaaq, taamatuttaaq naggataatigut innuttaasut taasitinneqarnissaanut tunngaviusussaalluni.
Tusagassiutinut nalunaarummi kakkiussatut ilanngunnerpoq uku ”Kalaallit Nunaanni Tunngaviusumik Inatsisissaq pillugu Isumalioqatigiissitap suliassaanut nassuiaatit” aamma ”Tunngaviusumik Inatsisissaq pillugu Isumalioqatigiissitap suliassaasa nassuiarneqarneranni sinaakkutissatut piumasaqaatit”.

Tunngaviusumik Inatsisissap allaqqitassiaasup naammassillugu Naalakkersuisunut tunniunneqarnissaanut piffissaatitaasoq tassaavoq Inuiattut ullorsiornermi juunip 21-iat 2021


Paasissutissat erseqqinnerusut pillugit immikkoortumi pisortaq Natuk Lund Olsen, oqarasuaatip normua: 345412, mail nlol@nanoq.gl atorlugit saaffigineqarsinnaavoq