Naalakkersuisut nunani avannarlerni suleqatigiinneq Kalaallillu Nunaanni inuussutissarsiutinik ineriartortitsineq siuarsarniarpaat

Nordiske flag

Nunani Avannarlerni Suleqatigiinnermut Naalakkersuisoq Vittus Qujaukitsoq aamma Inuussutissarsiornermut Nukissiuuteqarnermullu Naalakkersuisoq Aqqalu Jerimiassen, Nunanut Allanut Naalakkersuisoqarfillu 28. marts 2019-imi Katuami Nuummiittumi nunani avannarlerni suleqatigiinneq aamma Kalaallit Nunaanni inuussutissarsiutinik ineriartortitsineq pillugit Nunanik Avannarlernik Isumasioqatigiissitsissapput.

 

Naalakkersuisut nuannaarutigaat ukioq mannattaaq Kalaallit Nunaanni Nunani Avannarlerni suleqatigiit pingaarutilimmik ataatsimiittussaammata.

 

Kalaallit Nunaata nunat avannarliit suleqatigiinnerannut peqataanera Kalaallit Nunaannut nunanut allanut tunngasunik naalakkersuinikkut ingerlatsinermut aallaaviuvoq, tassuuna naalakkersuinikkut apeqqutit pisariaqalersut oqallisissanngortinneqartarmata. Tamakku ilaatigut tassaapput killeqarfinni akimmisaarutaasartut, suliffeqarneq, ilinniartitaaneq, inuussutissarsiorneq takornariaqarnerlu”, Aningaasaqarnermut Nunanilu Avannarlerni Suleqatigiinnermut Naalakkersuisoq Vittus Qujaukitsoq oqarpoq.

 

Ukiuni makkunani Kalaallit Nunaanni suliffeqarfiit ineriartorteqqinneqarnissaat pingaaruteqarpoq isumasioqatigiinnerlumi taanna Naalakkersuisut inuussutissarsiutinik siuarsaaniarlutik naalakkersuinikkut ingerlatsinerannut kusanarluinnartumik tapertaassaaq. Aatsaat nunarsuarmioqatitsinnik oqaloqateqartarutta nunatsinni suliffeqarfiit ataatsimoorluta aningaasaqarnermut tunngatillugu siunissatsinnut toqqammaviliisinnaapput”, Aqqalu Jerimiassen erseqqissaavoq. 

 

Nunat Avannarliit Suleqatigiinneranni suliffeqarfiit ukiumoortumik Nunat Avannarliit Isumasioqatigiinneranni, naalakkersuisoqarfinnit pingasunit, Aningaasaqarnermut Nunanilu Avannarlerni Suleqatigiinnermut Naalakkersuisoqarfimmit, Inuussutissarsiornermut Nukissiuuteqarnermullu Naalakkersuisoqarfimmit taamatullu Nunanut Allanut Naalakkersuisoqarfimmit, aaqqissuunneqartumi pingaarnertut qulequtaavoq.

 

Nunani Avannarlerni Suleqatigiinnermut Naalakkersuisut nunani allani suleqatigiinneq aamma Nunani Avannarlerni inuussutissarsiutit samminiarpai. Nunat avannarliit Kalaallit Nunaanni nunanilu avannarlerni allani ineqarnermut, inuussutissarsiutinut inuiaqatigiinnullu atortulersuutinut namminersortut aningaasaliisalernissaannut taarsigassarsinikkullu aningaasaliisarnissamut pitsaasunik periarfissiinissamut ikiuussinnaappat?

 

Nunani Avannarlerni Suleqatigiinnermut Naalakkersuisoq, Vittus Qujaukitsoq isumasioqatigiinnermik aallarniisuussaaq Kalaallit Nunaatalu Nunani Avannarlerni Ministerit Siunnersuisoqatigiivisa sulinerannut peqataanera aamma Kalaallit Nunaata, 2020-mi Nunani Avannarlerni ministerit siunnersuisoqatigiivinut danskit siulittaasuunerata ilaatut, 2020-mi siulittaasuusinnaanera oqalugiaatigissallugit.



Inuussutissarsiornermut Nukissiuuteqarnermullu Naalakkersuisoq Aqqalu Jerimiassen nutarterineq annertusaanermillu naalakkersuinikkut ingerlatsineq pillugit oqalugiassaaq.

Ukioq manna tikeraatut oqalugiartussanut ilaapput Senior Director Søren Kjær Mortensen Nordisk Investeringsbankimeersoq, Eqqartuussissuserisoq Henrik Græsdal Elmann Advokat partnerselskabimeersoq, Pisortaq Sverri Hansen Vestnordenfondenimeersoq Komitemut ilaasortaq Per Buhl Nordisk Atlantsamarbejde-meersoq (NORA). Isumasioqatigiinnerup ingerlanissaanut pilersaarut ilanngussatut ilanngunneqarpoq.

Nunat Avannarliit 2019-imi isumasioqatiginnerat Katuamit Nuummiittumit qarasaasiat aqqutigalugit toqqaanartumik isiginnaarneqarsinnaassaaq. Malinnaasinnaavusi una attaveqarfissaq toorlugu: https://digitalimik.adobeconnect.com/nordiskseminar2019/

Erseqqinnerusunik paasisaqarusuttut immikkut siunnersorti Nunanut Allanut Naalakkersuisoqarfimmeersoq Upaluk Poppel attaveqarfigisinnaavaat, upap@nanoq.gl

 

Nunaniavannarlerni suleqatigiinneq aamma Kalaallit Nunaanni inuussutissarsiutinikineriartortitsineq pillugit isumasioqatigiissitsinissamut pilersaarut unatoorlugu nuisiguk.