Ilinniartitaanermut Naalakkersuisup Kalaallisuuliornermik Ilinniarfik pulaarpaa

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger martsip aallartinnerani Kalaallisuuliornermik Ilinniarfimmut pulaarpoq.

Kalaallisuuliornermik Ilinniarfimmi ilinniartut ilinniartitsisut aqutsisullu kiisalu Kirstine Berthelsen katerisimaarput Ilinniartitaanermut Naalakkersuisoq Ane Lone Bagger ilinniarfimmut pulaarmat ulluinnarni ilinniarnerat ineqarnerallu pillugit tusarnaariartorlugit.

Kalaallisuuliornermik Ilinniarfimmi ilinniartut KTI-p (Kalaallit Nunaanni Teknikimik Ilinniarfik) ilinniartut inaannik aqutsinerata tamarmiusup ilagai. Ilinniartut ulluinnarni misigisartakkatik ineqatimilu isersimaartarfinnut pissusaat nikerartut pillugit oqaluttuarput. Tamanna ilinniartut ineqarfiisa eqqiluinneranut sunniuteqarpoq. Tassa imaappoq Inuit aalajangersimasut amerlanertigut eqqiaasarsimassapput.

Ilinniartut meerartallit errorsinermut ulluinnarnilu pisariaqartitanut aningaasartuutit eqqartorpaat. Ilinniarnersiutisiatik qaammatip naanissaanut naammassappata naammattusaaqqissaartariaqartarput.

Ilinniakkamik toqqaanissamut pitsaanerusumik siunnersorneqartarnissaq kissaatigineqarportaaq. Ilinniartut amerlasuut meeqqat atuarfianni naammassigamik angusarissaarsimasut ilinniarnertuunngorniarnissamut siunnersorneqarsimapput, uffa eqqumiitsuliornermik assassornermillu soqutigisaqaraluartut.

”Nunarput inunnik namminneq inuussutissarsiutigerusutaminnik sulerusuttunik ilinniarsimasunik amigaateqarpoq. Taamatuttaaq assassornikkut eqqumiitsuliornikkullu inuussutissarsiutini kiisalu ingerlaqqiffiusumik ilinniarfinni ilinniarnertuutut ingerlaqqiffiusinnaasuni”, oqarpoq Naalakkersuisoq, Ane Lone Bagger.

Paasisaqarnerorusukkuit Sussi Wille attavigiuk Toqq/direkte 345616, suwb@nanoq.gl