Siunissami kiffartuunneqarnissamut isumaqatigiissutissat aamma attaveqaqatigiinneq pillugit politikkikkut isumasioqatigiinneq

Pingasunngorneq ulloq 20. aamma sisamanngorneq ulloq 21. marsi 2019 nunatsinni borgmesterit, Inatsisartunut aamma Naalakkersuisunut ilaasortat siunissami kiffartuunneqarnissamut isumaqatigiissutissat aamma attaveqaqatigiinneq oqallisigalugit Nuummi katersuupput.

”Inoqarfiit 74-it angallannikkut attaveqaqatigiissinneqartussaammata aammalu ullutsinnut naleqquttumik attaveqaqatigiinnermi sullinneqartussaallutik, politikkerinut aamma ingerlatseqatigiiffinnut suliassami tassani akuusunut suliassaavoq annertooq” oqarpoq Karl Frederik Danielsen nangillunilu: ”Attaveqaqatigiinnerup sapinngisamik pitsaanerpaamik pitsanngorsarneqarnissaanut peqataanissaq Naalakkersuisutut suliassama pingaarnersaraat. Suliaqarnermi tassani pingaarnersiuilluarnissaq pisariaqarpoq, tassami aningaasaqarneq suliassap suliarinissaanut killiliisuummat. Pingaarnersiuineq pitsaanerpaaq aammalu aaqqiissutissat pitsaanerpaat kommunit aamma Inatsisartut suleqatigeqqissaarlugit iluarsineqartussaasoq qularinngilluinnarpara, taamaattumik isumasioqatigiinnermut matumunnga qaaqqusivunga.”

Isumasioqatigiinnermi ulloq siulleq, ilaasunik angallassinermi kiffartuunneqarnermut isumaqatigiissutit sammineqarput, angallassisartunit aammalu Borgmesterinit saqqummiisoqarluni. Saqqummiinerit oqallinnerillu paasinarsisippaat, innuttaasut sullinneqarnerannut eqqortunik atortoqarnissaq qulakkeerniarlugu, piffissat kiffartuunneqarnissamut isumaqatigiissuteqarfiusussat sivisunerunissaat politikkikkut soqutigineqartut. Taamatuttaaq periaatsit ataqatigiinnissaaasa pingaaruteqarnerat, qulimiguulimmik angallassinerup aamma imaatigut angallassinerup paarlakaatsinneqaannarsinnaanissaasa kissaatigineqarnerat ilanngullugu tikkuarneqarpoq.

Isumasioqatigiinnermi ullup aappaani nalunaarasuartaateqarneq, nassiussanik assartuussineq, mittarfiit pioreersut aamma nutaat, minnerunngitsumillu kommunit siunissami attaveqaqatigiinnermut takorluugaat, sammineqarput. Nunatsinni kommunit tallimaasut akornanni borgmesterit, siuariartortitsinissap pisussap nunatsinnut tamanut iluaqutaanissaa qulakkeerniarlugu, suleqatigiinnerunissaq siunnerfigaat. Tassunga atatillugu aningaasaqarnermut ilisimasalik aammalu Assartuussineq pillugu isumalioqatigiissitaasimasumut siulittaasuusimasoq Christen Sørensen ersarissumik kaammattuuteqarpoq:

”Mittarfinnut nutaanut aningaasaliinerit milliard-inik annertussuseqartut atorluarneqassapput. Aningaasaliinerni annertuuni taakkunani iluanaarutissat sapinngisamik piaarnerpaamik pissarsiarineqarnissaat pingaaruteqarpoq. Tassunga atatillugu suliassat pingaarnerpaat ilaat tassaavoq, nunatsinni maani – Namminersorlutik Oqartussat aamma kommunit akornanni – attaveqaqatigiinermut atatillugu pisariaqartunik aningaasaliinissamik qulakkeerinissaq, ilanngullugu Namminersorlutik Oqartussat aamma kommunit akornanni pisariaqartumik suleqatigiinnissaq, taamaalillutik aningaasaliinerit pisariaqartut piniassammata – aammalu tamanna piffissami eqqortumi pissalluni.”

Ullut marluk taakkua politikkikkut oqallinnernut pitsaasunut periarfissiipput. Kiffartuunneqarnissamut isumaqatigiissutissanut neqeroortitsinissamut aammalu attaveqaqatigiinnerup ineriartortinneqarnissaanut suliaqarnerup ingerlaqqinnissaanut borgmesterinit aammalu Inatsisartuni ilaasortanit peqataasunit pingaaruteqartunik immersuisoqarpoq.

Attaveqarfissaq: Naalakkersuisup allattaa Steve Sandgreen, maili: stes@nanoq.gl