GUX Sisimiuni ilinniartut ilinniartitaanermut Naalakkersuisumit pulaarneqartut

Ilinniartitaanermut, Kultureqarnermut, Ilageeqarnermullu Naalakkersuisup Ane Lone Bagger-ip ilinniartoqarfinnik, atuartunik ilinniagaqartunillu oqaloqateqarnini nangillugu ingerlappaa. Matumani GUX Sisimiuni ilinniartut ilinniarnerminni unammilligassaat periarfissaallu pillugit oqaloqatigisimavai.

Ane Lone Bagger-ip GUX Sisimiut ulloq 7. marts pulaarpaa, tassani ilinniartut assersuutigalugu ilinniartut ineqarfiini inuuneq immikkut sammivaat. Oqaatigaat pingaaruteqartoq ilinniartut ineqarfiini ulluinnarni najugaqarfigisaminni akisussaasumik najuuttoqartarnissaa. Ilinniartut ineqarfiini akisussaasup ilinniartut pitsaasumik atugaqarnissaannik ikiussavai, sammisassaqartitsinikkut ataatsimoortittassavai ilinniartunullu tusarnaarnissani piffissaqarfigisassavaa. Tassunga tulliullugu ilinniartunit annertuumik pingaartinneqarput qanimut attaveqaqatigiittarnissaq tatigeqatigiinnerlu. Ilinniartut ineqarfiini inuuneq ilinniartut ulluinnarni inuunerannut ilaalluinnarpoq, taamaammat najugaqarfimminni ajunngitsumik atugaqarnissaat pingaaruteqarpoq.

Ilinniartunit pingaartinneqartut allat tassaapput atisat akikitsumik errorneqarsinnaanissaat eqqiluisaartoqarnissaalu. Soorlu aamma ilinniartunit pingaartinneqartoq ilinniartut ineqarfiini avatangiiserisat eqqiluitsuunissaat atorneqarnissaannullu kaammattuisoqarnera.

”Ilinniartut ujartorpaat illoqarfimmi sunngiffimmi sammisassaqartitsinermi periarfissat amerlanerusut. Illoqarfik periarfissarissaarfiusoq sunngiffimmilu sammisassarissaartoq ilinniartut atugassaqartitaaneranni pingaartinneqarput. Ilinniarfiup avataani sammisassaqartitaaneq aallaaviusarpoq pitsaasoq, ilinniakkami pitsaasumik ingerlatsinissamut. “Taamaattumik kaammattuut taanna kommunimut ingerlatseqqikkumavara” – taamatut oqarpoq Ane Lone Bagger, ingerlaqqillunilu ”Ilinniartut periarfissarissaarnerusarput angusaqarluarnissamut, ulluinnarni killiliussat atugassarititaasut ajunngikkaangata. Ilinniagaqartunik atuartunillu assigiinngitsunik oqaloqateqartarneq uagutsinnut paasissutissiisarpoq apeqqutini pingaaruteqartuni iliuuseqarfigisinnaasatsinni.”

Paasissutissat sukumiinerusut pissarsiarineqarsinnaapput AC-fuldmægtigi Astrid Helena Malta, oqarasuaammut 34 56 74-mut toqqaannartumik sianerfigalugu, imaluunniit ahma@nanoq.gl aqqutigalugu saaffiginninnikkut