Ilinniartitaanermut Naalakkersuisup KTI Sisimiuniittoq takusarpaa

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup, Ane Lone Baggerip, ulloq 6. marts 2019 Sanaartornermik Ilinniarfik Sisimiuni takusarpaa, ilinniarnerminni ilinniartullu inaanniinnerminni misigisartagaat tusarusullugit. Ulloq taanna ataatsimiinnermi ilinniartut ilinniartitsisullu qalipaasussat VVS-ertullu ilinniarfiineersut ilaatigut najuupput.

Ilinniartut misigisimapput ilinniartut ineqarfiini atortulersuutit nungullarsimasut nutaanerusunillu pisaarusullutik. Naalakkersuisup Ane Lone Baggerip ilinniartut ineqarfiinut immikkoortukkaartumik nutaamik pilersaarusiortoqartoq ilisimatitsissutigaa aammattaaq Sisimiuni ilinniartut ineqarfissaannik nutaanik sanaartornernik imaqartussamik.

Ilinniartut suliassanut tunngatillugu ulluinnarni ikiuuttartussanik, kisiannili aammattaaq allanut tunngasunik siunnersuisartussanik, ilinniartut ineqarfiini sulisut takussaanerunissaat kissaatigaattaaq. Ilinniartut ineqarfianniinneq amerlasuunut nutaajuvoq ilinniartullu takkuterlaanut quppersagaaraliortoqarsinnaanera siunnersuutigaat. Quppersagaaraq taanna ilinniartut ineqarfiannut nuunnermi pissutsinik aamma ilinniartunngortussat suut nammineerlutik suliarisassallugit piareersimaffigisassaneraat paasissutissanik imaqarsinnaavoq.

Nalinginnaasumik kalaallisut ilinniartitsisoqartarpoq tunngaviusumilli atuakkat ilinniutissat qallunaatuujullutik. Taamaammat ilinniartitsisut ilinniartullu oqaatsinik marlunnik atuinissartik piffissamik atuiffigingaatsiartarpaat. Ilinniartitsisut ilaasa atortussarpaaluit nutsereersimavaat, tassami tunngaviusumik ilinniagassanut tunngatillugu oqaatsit allanngortanngimmata. Taamaammat siunnersuutigineqarpoq sanaartornermut ilinniartitaanerni assigiinngitsuni kalaallisut tunngaviusumik ilinniusiortoqarsinnaasoq iluaqutaasumik.

Ilinniartitaanermut Naalakkersuisoq Ane Lone Bagger oqaaseqarpoq:
”Qiimmaallannarpoq ilinniartitsisut ilinniartullu taama soqutiginnitsigisut oqaloqatigalugit, tamarmimmi ataasiakkaarlutik tamaviaarmata siunissami suliffeqarnermi assassornikkut suliassanik suliaqalersinnaajumallutik.”

Erseqqinnerusumik paasisaqarusuttut attaveqarfigisinnaavaat: Sussi Wille, Toqq 345616, suwb@nanoq.gl