Pituffimmut assartuinermi isumaqatigiissut amerikamiunut tunniuteqqinneqarpoq

Pituffimmut imaatigut assartuinermi isumaqatigiissut amerikamiut umiarsuaatileqatigiiffiannut tunniuteqqinneqarpoq

Amerikami illersornissaqarfiup aalajangersimavaa Danmarkip Pituffiullu/Thulillu akornanni usinik imaatigut assartuinermi amerikamiut umiarsuaatileqatigiiffiannut tunniunneqassasoq. Tassani pineqarpoq amerikamiut umiarsuaatileqatigiiffiat Schuyler Line Navigation Company LLC.

Royal Arctic Line ilisimatitsivoq suliassamut neqerooruteqarsimallutik. Suliariumannittussarsiuussinermili ajugaasimanatik. Amerikamiut illersornissaqarfianit ilisimatitsissutigineqarpoq kiffartuussinissamut isumaqatigiissummut pingasut neqerooruteqarsimasut. Aammattaaq ilisimatitsissutigineqarpoq isumaqatigiissut septemberip naanerani 2023 tungaanut ingerlassasoq.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger ima oqaaseqarpoq: ”Uggornarluinnarpoq kiffartuussinissamut isumaqatigiissut kalaallit umiarsuaatileqatigiiffiannut tunniuteqqinneqarnissaat pisinnaasimanngimmat” Naalakkersuisoq nangippoq: ”Naalakkersuisut danskit Nunanut Allanut Ministeriaqarfiat peqatigalugu amerikamiut nunatsinni sakkutooqarneranni kalaallinut pingaaruteqarnera pillugu USA-mut oqaloqatigiissutigineqaqqissaaq.”

Annertunerusumik paasisaqarusunnermi Naalakkersuisoqarfiup pisortaa Kenneth Høegh kenh@nanoq.gl imaluunniit +299 565604 aqqutigalugit attaveqarfigineqarsinnaavoq.