Killiliisami maligassiuisup Qaanaami kinguaassiuutitigut atornerluisarneq pillugu paqumisunneq kipitippaa

Naalakkersuisut kinguaassiuutitigut atornerluisarneq akiorniarlugu periusissiaat Killiliisa 2018-2022-ip ilaattut maligassiuisut pilersinneqartut arfinillit ilagaat Heidi Møller Isaksen. Heidi nammineq niviarsiaqqanut marlunnut kinguaassiuutitigut atornerlunneqarsimasunut anaanatut misilittakkani pillugit Qaanaamut sapaatip akunnera kingulleq marloriarluni oqalugiariartoqqullugu Avannaata Kommunianit qaaqquneqarpoq. Oqalugiarnernut taakkununnga marlunnut innuttaasut 25-30 peqataasarput, inimilu tatiginninneq ataatsimoornerlu annertooq Heidip killitsissutigaa:

- ”Unnunni taakkunani oqalugiarfigisanni inuit aggersut ”malugaakka”. Pitsaanerpaaq tassaavoq kinguaassiuutitigut atornerluisarneq pillugu paqumasunnermik kipititsinissamut akiuinissamullu nukkassimallutik takkuteqqittartut takullugit. Naak sammineqartoq artornaraluartoq, inimi ataatsimoortoqarpoq peqataasullu toqqissisimapput, saqqummertullu tamaasa qiaqatigaakka aamma paarlattuanik. Sorsuummi tamatta ilaavugut, imminnullu nukittorsaqatigiippugut, tassa taamatut misigaanga. Oqalugiaatinnut ersersitsinerit annertuut, aamma aggersut akornanni paquminartoq artornartoq pillugu ammaassisinnaanera suli attorteqqaffigaakka. Tamanna angutinut arnanullu atuuppoq,”

Killiliisami maligassiuisut innutaasullu peqataasut paariniarlugit, angalatitsinermi taakku kisimiitillugit angalatinneqarneq ajorput. Qaanaamut angalanermi Heidip Isumaginninnermut Aqutsisoqarfimmit siunnersortit marluk ilagai, taakku Heidi angalanerup nalaani tapersersorpaat peqatigisaanilu piffimmi sulianik suliaqartartunut kinguaassiuutitigut atornerluisarnermik suliaqarneq pillugu siunersiueqatigiinneq pikkorissaanerillu atorlugit piareersaasarlutik. Tamatuma saniatigut innuttaasunut peqataasunut upalungaarsimatitanik illoqarfimmiut piareersimatitsipput. Siunnersortit Heiditulli misigaat kinguaassiuutitigut atornerluisarnerup akiorneqarnissaanut illoqarfimmiut piumassuseqarluartut. Tikeraarnerup nalaani kinguaassiuutitigut atornerluineq akiorniarlugu suleqatigiissitamik pilersitsinissaq siunertaralugu kommune ataatsimiigiaqqusissasoq ilaatigut aalajangerneqarpoq. Oqalugiarnermi ataatsimi angutit marluk nammineq piumassusertik tunngavigalugu suleqatigiissitassami ilaaniarlutik nalunaareerput.
Kinguaassiuutitigut atornerluisarneq pineqartillugu, qanigisaasut takkuitsoorneqakkajuttarput, taakku sammineqarneq ajorput ikiorneqarnissamillu neqeroorfigineqassanatik. Maligassiuisutut Heidip Qaanaami innuttaasut misilittakkaminnik ammasumik oqaluuseqaqqullugit isummersorpai, aamma anniaammik allanut avitseqateqarnerup qanoq pingaaruteqassusia tikkuarlugu:

- ”Qaanaami innuttaasut oqaluttuassaminnik avitseqatigisinnaammannga qujamasuutigeqaara, tamannami tatiginninnerujussuarmik takutitsivoq, taakkununngalu assut maniguuppunga. Qaanaamut angalaneq annertoqaaq pingaaruteqaqalunilu – qanigisaasutullu angalanissatsinnut aallartinnerinnaalluni: tassalu qanigisaasutut anniaatigut pillugit ammasumik oqaloqatiginnissinnaanermut kiisalu immitsinni nukissamik aallersinnaanermut angalaneq. Nukik meeqqatsinnut iluaqutaasussaq. Meeqqamut kinguaassiuutitigut atornerlunneqarsimasumut qanigisaaneq kanngunartuunngilaq. Kanngunartuuvorli tamanna pillugu NIPANGIUSSINEQ...”


Attavissaq
Paasisaqarnerorusukkuit Allaffimmi pisortaq Ditte Sølvbeck e-mail: ditt@nanoq.gl, tlf.nr. +299 346037 attavigiuk

Imaluunniit

Ministerip allattaa, Inger Heilmann Larsen, e-mail: ihal@nanoq.gl, tlf.nr.+299 554160 attavigiuk