Kommuneqarfik Sermersuumi attaveqaqatigiinneq pillugu isumasioqatigiinneq

Ineqarnermut Attaveqaqatigiinnermullu Naalakkersuisoq Karl Frederik Danielsen aamma Kommuneqarfik Sermersuumi borgmesteri Asii Chemnitz Narup, tallimanngorneq ulloq 15. marts 2019 Nuummi attaveqaqatigiinneq pillugu ataatsimoorussamik isumasioqatigiissitsipput.

Isumasioqatigiinneq attaveqaqatigiinneq pillugu isumasioqatigiissitsinerit arlallit, kommunit tamaasa peqatigalugit ingerlanneqartut, kingullersaraat.

Karl Frederik Danielsen oqarpoq:
”Nuummi mittarfissap neqeroortitsivigineqarnera maannakkut allartinneqareerpoq. Nuummi inuussutissarsiortut maannangaaq sulillutik aallartereersimasut aammalu siunissamut Nuup avataaneersunit tikikkuminarnerulertussaaneranut piareersalereersimasut, Borgmesterilu isumasioqatigiissitsinerup nalaani paasivarput.”

Asii Chemnitz Narup oqarpoq:

”Nuummi mittarfissap piareersarneqarnera ukiorpassuit ingerlasimavoq. Suliassat maannakkut neqeroortitsineq aallartinneqarluni kiisami tamaanga killimmat kommunalbestyrelsimit nuannaarutigisorujussuuarput. Mittarfissap aamma takornariartitsinermik inuussutissarsiornermillu siuariartortitsinissaanut sapinngisamik pitsaanerpaanik atugassaqartitsinissaq, kommunalbestyrelsimi sammisorujussuuarput.”

Mittarfiup tallilerneqarnissaata pisussap saniatigut Tasiilami aamma Ittoqqortoormiini attaveqaqatigiinneq sammineqarpoq. Nalunaarasuartaateqarnermut suliassaqarfimmi suliniuteqarnerit pisussat aammalu umiarsualiveqarfinni arlalinni aserfallatsaaliuinissaq oqallisigineqarput, aammalu Namminersorlutik Oqartussat, Kommunip aamma Tunumi suliassanik suliarinninnermut atatillugu suliaqartut allat akornanni suleqatigiinnerulernissaq sammineqarpoq.

Naggasiineq:
Sapaatit akunneranni 12-imi Naalakkersuisut, Inatsisartut aammalu kommunini tallimani borgmesterit politikkikkut isumasioqatigiissinneqarneranni attaveqaqatigiinneq pillugu isumasioqatigiissitsinerit tulleriiaat naggaserneqassapput.

Isumasioqatigiissitsinerit ingerlanneqareersut kiffartuunneqarnissamut isumaqatigiissutissanut tunngatillugu sammivissaliissasut Naalakkersuisoq Karl Frederik Danielsen annertuumik neriuuteqarpoq, aammalu oqarluni:

”Inatsisartunut ilaasortat, borgmesterit aamma Naalakkersuisut isumasioqatigiinneranni kiffartuunneqarnissamut isumaqatigiissutissanut kissaatigineqartut pillugit immersorneqassaanga. Politikkikkut oqallinnissaq qilanaaraara,” Naalakkersuisoq Karl Frederik Danielsen naggasiivoq.

Annertunerusumik paasisaqarusunnermi Naalakkersuisup allattaa Steve Sandgreen stes@nanoq.gl imaluunniit +299 596659 aqqutigalugit attaveqarfigineqarsinnaavoq.