GUX Aasiaat Naalakkersuisumik Ane Lone Baggerimik oqaloqateqarnera

Nunami ilinniarfiit arlallit piffissami kingullermi ilinniarnermik ingerlatsiinnarnissaq pillugu Ilinniartitaanermut Naalakkersuisoq Ane Lone Bagger oqaloqatigisarsimavaat. Naalakkersuisup ilinniartut ilinniarnerminni pitsaanerusumik atugaqalernissartik ilinniarnerminnillu naammassinninnissartik pillugu qanoq takorluugaqarnersut ataatsimeeqatigalugit oqaloqatigisarsimavai.

GUX Aasiaat ulloq 5. marts Ane Lone Bagger atuarfimmut pulaarmat ajunngitsumik tikilluaqqusivoq. Oqaloqatigiinnermi ukkatarineqarput ilinniarnertuunngorniarnermi pitsaanerusumik atugaqalernissap ilinniarnermillu naammassinninnissap qanoq qulakkeerneqarsinnaanerat.

Ane Lone Baggerip ilaatigut inersimasut ukiuni marlunni ilinniarnerminnik ingerlatsisut naapippai, taakkunannga arlallit meeraqarput. Ilinniartut ilaasa oqaatigaat meeraqarluni ilinniagaqarneq unammillernartuusoq. Assersuutigalugu inigisami sinittarfeqanngitsumi inissat killeqartarput aamma inuttut eqqissilluni inuuneqarsinnaaneq ajornarsinnaasoq. Aamma ilinniarnermik malinnaaniarneq unammillernarsinnaavoq. Meeqqat napparsimagaangata atuanngitsoortoqartarpoq, taamaalilluni ilinniarnermut malinnaaniarneq ajornarsisarpoq naggataatigullu ilinniakkamik unitsitsiinnartoqarsinnaalluni. GUX Aasiaat ilinniartui 120-t missaannik meeraqarput, tassa ilinniartut inaanni inissaqarniarnermut tamanna immikkut unammilligassaqartitsisarpoq.

Tamatuma saniatigut ilinniartut ilinniarfimmilu sulisut oqaatigaat ilinniartut inaanni ilinniagaqartunut pitsaasumik atugassaqartitsinissaq pingaaruteqarluinnartoq. Tamanna ilinniarfimmi ukkatarineqarpoq, tassa ilinniartut inaanni perorsaasut ilinniartut nerisassanut tunngatillugu pilersaarusiorneranni ikiortarpaat, ullaakkut itersartarpaat aningaasaqarnerannillu pilersaarusioqatigisarlugit.

”Atuartuutivut ilinniartuutivullu assigiinngitsupilussuupput aamma pisariaqartitaat assigiinngitsuupput. Tamarmik inissaqartinneqassapput. Tassa ilinniartut meerartallit aamma inuusuttunnguit siullermeerlutik angerlarsimaffitsik qimallugu ilinniagaqalersut inissaqartinneqassapput. Atuartut ilinniartullu oqaloqatigineranni paasisaqaqaanga. Suleriaqqinnissatsinnut tamanna pingaaruteqarpoq,” oqarpoq Naalakkersuisoq Ane Lone Bagger.

Paasissutissat sukumiinerusut pissarsiarineqarsinnaapput ilinniartitaanermi inspektøri Lotte Sandberg Kjærimut, oqa.: 345723, e-mail: lokj@nanoq.gl aqqutigalugit saaffiginninnikkut.