Uuliasiorfimmi ilorraap tungaanut ingerlaarneq nangippoq


Jameson Landimi nunami sumiiffimmut Greenland Gas and Oil Limited’imut (GGO-mut) uuliasiorlunilu iluaquteqarnissamut tunniussisoqassasoq Naalakkersuisut akuersissutigisimavaat.

Qinnuteqarfigisamiippoq 2600 km2-it missaat, Tunumi Jameson Landimi inissisimaffilik. Sumiiffik ataani nunap assingani takuneqarsinnaavoq.



GGO tassaavoq Tuluit Nunaanni tunngaveqartutut uuliasiornermik gassisiornermillu ingerlatseqatigiiffik, Kalaallit Nunaannik alaatsinaataqartoq. Uuliaqarfittut tunisassiorfiulersillugu Jameson Landimi akuersissuteqarfiup ineriartortinnissaa ingerlatseqatigiiffiup periusissiaraa.

Uuliasiornermik ingerlatassamik ataatsimik, ilaatigut akuersissuteqarfiup iluani qillerinermik ingerlatsinissamik ilaqartumik pisortat qanimut oqaloqatigalugit naammassisaqarnissani ingerlatseqatigiiffiup pilersaarusiorpaa, ilaatigut ukiut marluk iluani qillerinissamut imalik.

Greenland Gas and Oil’imut akuersissutip saniatigut Kitaani aamma Avannaani imartami paasissutissanik geofysiskinik – nunatamut tunngassutilinnik – katersuinissamut nunat tamalaani qaartiterinikkut sajutsitsilluni misissuisartutut ingerlatseqatigiiffimmut TGS-Nopec Geophysical Company ASA-mut misissueqqaarnissamut akuersissutit marluk nalunaarutaaqqammerput.

Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq:
”Kalaallit Nunaanni uuliasiornermut tunngatillugu killup tungaanut ingerlaarnerup saqinnissaa iluatsittoq akuersissutikkut kingullikkut erseqqarissisimavoq. Maannakkut 2018-illi qeqqanit uuliasiornermik suliassaqarfimmi ujaasillunilu iluaquteqarnissamut akuersissutit nutaat katillugit sisamat nalunaarutiginissaat qinnuteqaataapput.
Ussassaarinermik iliuuserisaq nukittorsarlugu misileraanissaq eqqortuusimasoq allanngoriartornerit kingulliit takutippaat. Uuliasiornermik ingerlatseqatigiiffinnut ornigunnerunissaq akilersinnaavoq.”


Annertunerusumik paasissutissaqarusukkuit uunga saaffiginnigit:
Inuussutissarsiornermut Nukissiuuteqarnermullu Naalakkersuisoqarfik, e-mail: isiin@nanoq.gl