Avalak-mut aningaasaliissutit pillugit erseqqissaaneq

Avalak-mut aningaasaliissutit appaavigineqarsimaneri pillugit oqallinnermut atatillugu pingaaruteqartutut isigaara pissutsit arlaqartut erseqqissaaviginissaat.

Tunuliaqutaasut
Aallarniutigalugu erseqqinnerusumik nassuiaateqarfigissavakka Avalak-mut aningaasaliissutit, aningaasat inatsimmi 2016-imi 400.000 kr.-inik aningaasaliiffigineqarnerat. 2016-imut aningaasanut inatsisissatut siunnersuummi siullermeerneqarnerani 200.000 kr.-it Avalammut aningaasaliissutissatut immikkoortinneqarsimagaluarput. Kingornagut pingajussaaneerinninnermi ilassutissatut 200.000 kr.-inik ilassusiisoqarpoq. Tamatumunngalu ilaatigut tunuliaqutaavoq Avalak ilaasortat akiliuteqartarneranni unammilligassaqarmat, aammali nunatsinni ilinniarsimassutsip qaffasinnerulersinniarnerani suliaqarnermigut.

Ilanngullugulu erseqqissaatissaavoq pineqartoq tassaammat peqatigiiffimmut tapiissuteqartarneq, tassanilu ilinniagaqartunut ilinniagaqarnersiutit pineqanngimmata.

Erseqqissaatit
KNR-ip allaaserisaanut ”Naalakkersuisoq: Avalak nammineerluni aningaasanik qinnuteqarsinnaavoq” 7. marts 2019-imeersumi ersippoq Avalak 200.000 kr.-inik ingerlatsinermut aningaasartuutinut Sorlammi ilaasortaanermini tapiiffigineqartartoq. Tamanna eqqortumik issuaanerunngilaq, tassami Avalak ingerlatsinermut tapiissutinik tunineqartanngimmat aningaasat ukiuat 2016 sioqqullugu.

Sermitsiap allaaserisaani ”Ane Lone Bagger: Avalammut tapiissutit amerlineqarsimanerat utaqqiisaarutaannaavoq” 7. marts 2019-imeersumi nalunaarneqarpoq 2016-imut aningaasanut inatsimmi imaaliinnarluni ersinngitsoq qaffaaneq taamaallaat piffissami aalajangersimasumi atuuttussaasoq.

Paasissutissat taakkua nassaariuminaammata isumaqataavunga. Taamaattoq Inatsisartut Aningaasaqarnermut Akileraartarnermullu Ataatsimiititaliaata Naalakkersuisunit ulloq 28. september 2015, AIS 2016 pillugu akissutaanni ersippoq una "Piffissami naleqqussaaviusumi allannguutip kingunerisimavaa eqeersimaarnerusumik suliniuteqartoqarnissaata pisariaqartinneqarnera ilaasortassarsiornermi, kiisalu ilaasortaanermut akiliutinik akiliisoqartarnissaani. "Piffissaq naleqqussarfiusoq tamatumunnga atatillugu tassaavoq piffissaq Sorlaap avinneqarnerata kingorna, tamatumanilu pisariaqalersimalluni ilaasortassarsiorluni suliniuteqarnissaq. Taamaasillunilu taamanikkulli Inatsisartunut erseqqissaatigineqarpoq aningaasaliissutaasut annertussusiat piffissami pineqartumi naleqqussartoqarneranut pineqartumut atasuusoq.

Taamaattumik Avalak piffissami 2016 – 2018 aningaasaliissutinik immikkuullarissunik aningaasaliiffigineqartarsimavoq ilaasortassarsiornerminut atatillugu, aammalu ilaasortaanermut akiliuteqartoqartarnissaanut. Suliniutit taakkua qanoq ingerlanersut pillugu Avalak ataatsimeeqatigerusuttorujussuuara.

Naatsorsuutinik tunniussisarnissap pingaarutaa
Taakkulu qaavatigut oqaatigineqassaaq Avalak aningaasaliiffigineqartarmat Kulturikkut ingerlatsineq sunngiffimmilu sammisassaqartitsineq pillugit Inatsisartut inatsisaat nr. 5, 6. juni 2016-imeersoq naapertorlugu. Tassanilu aalajangersagaqarpoq malittarisassanik, naatsorsuutinut aamma kukkunersiuisoqarneranut tunngatillugu, tamatumanissaaq uppernarsaasoqartassasoq tapiissutit siunertaasunut atorneqartarneri pillugit. Tamatumanilu pineqarput malittarisassat peqatigiiffinnut il.il. tamanut atuuttuusut, akileraarutinit aningaasalersorneqartartunik tapiiffigineqartartunut.
Tamatumunngalu atatillugu Avalak-p ukiup naatsorsuusiorfiusup 2014/15-ip kingornali naatsorsuutiminik nassiussaqarsimanngimmata Naalakkersuisut uggoraat, naak assersuutigalugu 2016/17-imut naatsorsuutiminik nassiusseqqullugu peqatigiiffik qinnuigineqareeraluartoq. Naatsorsuutillu 2016/17-imut tunngasut taakkuupput paasissutissanik pingaaruteqartunik imaqartut, uppernarsarsinnaajumallugu aningaasaliissutit siunertanut atorneqarfissavimminnut atorneqarsimaneri, nalilersorsinnaajumallugulu peqatigiiffik qanoq pisariaqartitsisimasinnaanersoq 2019-imut tunngatillugu. Naalakkersuisullu neriuutigaat Avalak piaartumik ukiumoortumik naatsorsuutiminik nassiussaqassasoq.

Ukiumoortumik naatsorsuutini kingullermik tiguneqartuni 2013/14-imut aamma 2014/15-imut ersippoq Avalak aningaasartuuteqarsimasoq 194.727 kr.-inik aamma 208.039 kr.-inik. Ukiumoortumik naatsorsuutini taakkunani aamma ersippoq Avalak isertitaqartarsimasoq 273.803 kr.-inik aamma 129.200 kr.-inik. Isertitat - malugalugu – Aningaasanut Inatsimmiit ingerlatsinermut tapiissutaasuniiunngitsut. Isertitalli ilaatigut tassaasimapput 159.125 kr.-it tipsernermi lottornermilu tapiissutaasut.

Naalakkersuisut tipsernermi lottornermilu aningaasaliissutaanit qinnuteqarnissamut periarfissaq
Avalak suli periarfissaraa kalaallit nunaanneersunit tipsernermi lottornermilu aningaasaliissutiniit qinnuteqarsinnaalluni, aningaasanoorutit ilaannit iluanaarutinit agguaassisarneq pillugu Inatsisartut Inatsisaat nr. 10, 22. november 2011-meersoq naapertorlugu. Inatsimmi § 3, imm. 3 naapertorlugu ersippoq Avalak periarfissaqartoq tapiiffigineqarsinnaanermut, naak peqatigiiffik Danmark-imi angerlarsimaffeqaraluartoq. Tamatumunnga tunngavilersuutaavoq ilinniagaqartut Danmark-imi najugaqarallaannarneri, taamalu suli Kalaallit Nunaannut atasuullutik. Tamatumalu saniatigut aalajangersakkamut tunngavilersuutaavoq pingaartinneqartoq kalaallit ilinniagaqartut kulturikkut sammisaqartitsisarnissaannik periarfissaqarnissaat.

Tamatumunngalu uiggiullugu oqaatigineqassaaq Avalak aningaasaliissutaasut 400.000 kr.-inut qaffanneqarmatali tipsernermi lottornermilu tapiissutinik ingerlatsinissaminut periarfissamik atuilluni qinnuteqaateqarsimanngitsoq. Ukiumoortumik naatsorsuutini kingullerni nassiunneqartuni (2014/2015) ersippoq Avalak 110.656 kr.-inik aammalu 107.025 kr.-inik, seminareqartitsinernut ataatsimullu katersuutsitsisarnernut atuisarsimasoq. Sammisaqarnerit Avalaap tipsernermi lottornermilu aningaasaliissutiniit qinnuteqarfigisinnaasaanit.

2019-imut aningaasanut inatsimmi aningaasaliissutaasut annertussusaannut tunuliaqutaasut
2019-imut aningaasanut inatsisissamut siunnersuutip suliarineqarneranut atatillugu Naalakkersuisut partiillu tapertaasut akornanni suleqatigiinnermi aningaasartuutissanut missingersuusiani sipaarutissarsisoqarnissaa piumasarineqarpoq, suliniutinik pingaaruteqartunik aallartitsisoqarsinnaaqqullugu, assersuutigalugu innuttaasut peqqissusaasa pitsanngorsarneqarnissaat, timersornerup annertunerulersinneratigut. Tamakku tamaasa katinnerani, Avalallu suli tipsernermi lottornermillu aningaasaliissutinik ingerlatassanut qinnuteqarnissamut periarfissaqarmat, kiisalu ukiumoortumik naatsorsuutini kingullermik nassiunneqartuni ersimmat ataatsimut aningaasartuutaasut katillugit tamakkiisumik 200.000 kr.-it missaanniittut, 2019-imut aningaasanut inatsimmi aningaasaliissutissat 200.000 kr.-iunissaat tunngavilersuutaammat.

Avalak nunatsinniit Danmark-imut ilinniariartortartunut sammisunik suliniuteqartuummat Naalakkersuisut qujagivaat. Qujamasunnittalu ersiutigivaa Avalak ilaasortat malillugit suli qaffasinnerpaamik aningaasaliivigineqartarmat, nuna tamakkerlugu meeqqanut inuusuttuaqqanullu kattuffiit akornanni, kiisalu inatsisit ima aaqqissuussaallutik, Avalak tipsernimi lottornermilu tapiissutinik tunineqarsinnaanermik qinnuteqarsinnaalluni. Ilanngullugu eqqaaneqarsinnaavarput ilinniagaqartut kattuffit Ili Ili 132.000 kr.-inik tapiissutisisarmat. Taamaattumillu Avalak kaammattorumavara sammisassaqartitsinermi aningaasaliissutissanik qinnuteqartarsimanertik misilittagaqarfigilluartarsimasatik pitsaasut ingerlateqqileqqullugit.

Naalakkersuisut suli ilinniartitaanerit pingaartilluinnarpaat
Eqqaamaneqassaaq ilinniartitaanermik suliniutit Naalakkersuisut sulineranni qitiulluinnartumik inissisimammata. Aningaasanut inatsisilli tamarmik tassaasarput isumaqatigiinniarnerit, pigisatsinnik tulleriiaariffiusartut. Taamaattumillu tulluusimaarutigaara suli pingaarnersiuinitsinni ilinniartitaanertigut annertusaanissamut periarfissatsinnik pingaartitsinerput, nunatsinni inuiaqatigiinni pisariaqartitsinerput naapertorlugu, anguniakkagullu aningaasarsiornikkut nunatsinni immitsinnut napatittuunissatsinnik naapertorlugit.

Assersuutigalugulu aningaasanut 2019-imut inatsimmi immikkoortissimavagut 1,3 mio. kr.-it, aalisakkerinermik teknologiimut atatillugu diplom-ertalimmik ingeniørimut ilinniartitaanerup nutaap aallartinnissaanut. Ilinniartitaaneq taanna peqataassaaq teknologiimik nutaamik atortorissaaruteqarnerup aalisakkanillu inuussutissarsiuteqarnerup naammassisaqarneruleriartornissaanut ineriartornissaanullu.
Assersuutigalugu Naalakkersuisut 2019-imi Aningaasanut inatsimmi ulluunerani paaqqinnittarfinni sulisunut tunngasut 3 mio. kr. aningaasaliissutissarsivaat. Taavalu 1,3 mio. kr. teknikkikkut ilinniartitaanernut.

Aammattaaq oqaatigerusupparput uagut maani nunatsinni ilinniartitaanernik aaqqissuussinernik pitsaasunik peqarnerput, ilinniagaqartortatta ilinniakkaminnik naammassinnittarnissaannik periarfissiisumik. Ilinniagaqartortagut qaammammoortunik ilinniagaqarnersiuteqarnermi saniatigut, akiliunneqarluni angalasarnerit il.il. Ilinniarnermi nalaani aningaasanik taarsigassarsiaqalersimagunillu periarfissaqarput, taarsersuinerminni, taarsersuinermut aningaasartuutit oqimaassinnaasunik 50 %-it angullugit taperneqarsinnaanerminnik, tassani ilinniagaqartortatta nunatsinni aalajangersimasumik najugaqalernerata kingorna. Tamakkualu tunuliaqutaralugit qularutigineqarsinnaanngilaq Naalakkersuisut ilinniartitaanerit pingaartitarigaat ilinniagaqartortagullu tapersersoraat.

Inussiarnersumik inuulluaqqusillunga

Ane Lone Bagger