Ataatsimeeqatigeereernerup kingorna oqaaseqaat

Inuussutissarsiornermut ministerip aamma Inuussutissarsiornermut Nukissiuuteqarnermullu Naalakkersuisup ulloq 15. marts 2019 ataatsimeeqatigeereernerisa kingorna oqaaseqaat

Danmarkip aamma Kalaallit Nunaata akornanni inuussutissarsiornermi suleqatigiinnerup nukittorsarneqarnissaa pillugu isumaqatigiissut ullumi Inuussutissarsiornermut ministerip aamma Inuussutissarsiornermut Nukissiuuteqarnermullu Naalakkersuisup atsiorpaat.

Isumaqatigiissummi Namminersorlutik Oqartussat aamma naalagaaffiup Vækstfonden-imi aamma Greenland Venture-mi aningaasaleeqataassutaat pillugit pissutsit erseqqarinnerusut aalajangersarneqarput, taakku tassaallutik danskit naalakkersuisuisa aamma Naalakkersuisut Kalaallit Nunaanni mittarfiliassani danskit suleqataanissaat aamma Kalaallit Nunaata Danmarkillu akornanni inuussutissarsiornermi suleqatigiinnerup nukittorsarneqarnissaa pillugu isumaqatigiissummi 10. september 2018-imeersumi ilaatinneqartut.

Inuussutissarsiornermut ministeri Rasmus Jarlov oqarpoq:
"Greenland Venture aamma Vækstfonden isumaqatigiissut manna tunngavigalugu Kalaallit Nunaanni aningaasaatinik annaasaqaataasinnaasunik aamma aningaasaliinernik pissarsinissamut periarfissat nukittunerusumik aamma pimoorussisumik nukittunerulermata nuannaarutigaara. Isumaqatigiissut Vækstfonden-ip aamma Greenland Venture-p Kalaallit Nunaanni inuussutissarsiornerup ineriartortinneqarnissaanut iluaqutaasumik piginnaasaqarnerminnik atuisitsisinnaalernissaannut sinaakkutissiilluarpoq".

Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq:
"Kalaallit Nunaanni inuussutissarsiornerup ineriartortinneqarnissaanut 220 mio. koruuninik aningaasaliinissaq pillugu isumaqatigiissuteqarneq, Kalaallit Nunaanni aallarnisaanernik aamma inuussutissarsiutinik nutaanik ineriartortitsinissamut Naalakkersuisut suliniuteqarnerannut annertuumik pitsanngorsaataavoq ", nangillunilu:
"Ukiuni kingullerni tunisassianik ineriartortitsinermut tapiissuteqartarnikkut suliffeqarfippassuarnut namminersortunut avammut nioqquteqarnissamut tapersiisarnikkut, ilaatigut sermimut imermullu, takornariartitsisarnermut il.il. suliassaqarfiit iluanni inuussutissarsiutinik nutaanik ineriartortitsinikkut, Naalakkersuisut inuussutissarsiutinik siuarsaanermik annertuumik ingerlataqareerput. Aningaasaliissutit ataatsimoortut 220 mio. koruuninik annertussuseqartut suliffeqarfinnut namminersortut inuussutissarsiutinik nutaanik ingerlataqarneranni peqataarusuttunut annertuumik periarfissaqalersitsisussaapput ".

Isumaqatigiissummi immikkoortut pingaarnerit
  • Vækstfonden aamma Greenland Venture akornanni suleqatigiilluni inuussutissarsiornermi inuussutissarsiornermut suliniuteqarnerit aalajangersimasut pingasut, Kalaallit Nunaanni inuussutissarsiornikkut siuariartortitsinermik nukittorsaasussat, aallartinneqassapput:
    1. Aningaasaleeqataassutinik akiliuteqarneq 200 mio. koruuninik annertussusilinnik Greenland Venture-imut aamma Ineriartortitsinermut Aningaasaateqarfimmut – Vækstfonden, Kalaallit Nunaanni suliffeqarfinnut siuariartornissamut periarfissaqartunut aningaasaliinermut atorneqassapput. Aningaasaliinerit taarsigassarsisitsinertut, qularnaveeqqusiinertut, akiliussisussamaataanertut, aningaasaleeqataanikkut assigisaattullu ilusilimmik Kalaallit Nunaanni suliffeqarfinnut aningaasaliinerusinnaapput.
    2. Suliniutinik inerilluartitsinissamut aningaasaliissutit ataatsimoortut 20 mio. koruuninik annertussuseqartut, suliniutit arlallit inerilluartinnissaannut atorneqartussat, taamaalillunilu suliffeqarfiit aningaasaliiffigineqarnissamut piareersimasut amerlanerulersinneqassallutik.
    3. Siuariartortitsinissamut qularnaveeqqusiinerit. Vækstfonden Kalaallit Nunaanni Siuariartortitsinissamut qularnaveeqqusiinissamut periarfissaqalissaaq, assersuutigalugu sanaartornermut annertunerusunut aningaasaliinernut, suliffeqarfinnut angisuunut, aatsitassarsiorfinnut il.il. aningaasaliinernut.
  • Katillugit 220 mio. koruunit inuussutissarsiornermi suleqatigiinnermut immikkoortinneqarput, taakkunannga katillugit 22 mio. koruunit Namminersorlutik Oqartussanit aningaasalersorneqassallutik aammalu 198 mio. koruunit naalagaaffimmit aningaasalersorneqassallutik.