Tuluit Nunaata Naalakkersuisuisa Kalaallit Nunaata Tuluit Nunaannut aalisakkat tunisartagai pingaarnerit akitsuusersornianngilaat

Pingasunngornermi marsip 13-anni 2019 Tuluit Nunaata Naalakkersuisuisa nioqqutissat eqqussuunneqartut akitsuutigigallagassat allattorsimaffiannik saqqummiussaqarput, taannalu nioqqutissanut eqqussuussanut atuutissaaq, Tuluit Nunaata EU-mut Brexit pillugu isumaqatigiissuteqassanngippata – taaneqartartumik No Deal Brexit. Kalaallit Nunaata raajanik saarullinnillu nioqqutissiai allattugaatinut ilaanngillat, tamannalu No deal Brexit piviusunngussappat Tuluit Nunaata Inatsisartuinit akuersissutigineqassaaq. Ima paasineqassaaq: Tuluit Nunaata Raajanik Saarullinnillu tunisassianik Kalaallit Nunaanneersunik akitsuusersuinissaq pilersaarutiginngikkaat. Taamaalilluni Kalaallit Nunaata Tuluit Nunaannut ukiumut tunisartagai 700 mio. kr. sinnerlugit annertutigisut allattugaatit atuutilerneranit ukioq siulleq akisunerulersitsisumik akitsuuserneqassanngillat.

Illuatungaani EU-p Tuluit Nunaatalu Brexitimut isumaqatigiissutissatut siunnersuutaanni akuerineqassappat Kalaallit Nunaata aalisakkatigut nioqqutissiaasa 2020-p naanerata tungaanut akitsuusersorneqassanngillat.

Tuluit Nunaata Kalaallit Nunaatalu niuernikkut ataavartumik isumaqatigiissuteqarnissaq anguniarlugu Naalakkersuisut sulinertik ingerlatiinnassavaat, naak piffissami siullermi Kalaallit Nunaata Tuluit Nunaannut tunisassiaanut akitsuusersuinnginnissaq siunniussaagaluartoq.

Ilinniartitaanermut, Kultureqarnermut, Ilageeqarnermut, Nunanullu allanut Naalakkersuisoq Ane Lone Bagger ima oqaaseqarpoq:
”Kalaallit Nunaata raajanik saarullinnillu tunisassiaasa Tuluit Nunaanni akitsuusersorneqarnissaannut ilaannginnera ineriartorneruvoq pitsaasoq, naak aalisakkanik tunisassianik allanik akitsuusersoneqartussanik peqartoq. Taamaalilluni ukiumi tulliuttumi Kalaallit Nunaata Tuluit Nunaannut tunisassiaasa maannakkutut unammilleqatigiinnermi ajornerusumut inissittussaanngitsut takuneqarsinnaavoq, akitsuutinimmi akitsorsaataasinnaasunik inissiisoqanngimmat. Tuluit Nunaata Kalaallit Nunaatalu niuernikkut ataavartumik isumaqatigiissuteqarnissaq anguniarlugu Naalakkersuisut sulinertik ingerlatiinnassavaat, taamaalillunilu Kalaallit Nunaata Tuluit Nunaannut attaveqaqatigiinnerat.”


Annertunerusumik paasisaqarusukkussi attavigisinnaavarsi: Mininnguaq Kleist, mail mikl@nanoq.gl, mobil: +32 499 99 98 58