Naalagaaffiit Peqatigiit nunarsuaq tamakkerlugu ineriartortitsinissamut anguniagaasa 17-it naammassineqarnissaat ataatsimoorupparput

Stemningsbillede af Indlandsisen Naalagaaffiit Peqatigiit nunarsuaq tamakkerlugu ineriartortitsinissamut anguniakkanik 17-inik saqqummiussivoq, taakkulu siunissami nungusaataannginnerusumik siunnerfeqarnissamut siunnerfilissavaatigut, taamaaliornermilu arlaannaalluunniit katataassanngilaq. Tamatumani ilaatigut naligiissitaaneq, meeqqat pisinnaatitaaffii, kikkut tamarmik ilinniagaqarnissaat, avatangiisit kiisalu ataatsimut pisuussutitsinnik nungusaataanngitsumik toqqammaveqarluta iluaquteqarnissarput pineqarput. Anguniakkat qulequtaanerusunngorlugit oqaasertalerneqarput, taamaaliornermimi nunat ataasiakkaat ataatsimoorlutik taakkunannga sukumiisunngortitsillutillu piviusunngortitsissapput.

Tamannalu aallaavigalugu nunat atlantikup avannaanniittut ”Naalagaaffiit Peqatigiit nunarsuarmut tamarmut anguniagaat atlantikup avannaanit qiviarlugit”-mik qulequtalimmik Christiansborgimi ataatsimeeqatigiipput. Ataatsimiinnermi ingammik ataatsimoorfigisatsinni misilittakkat makku naalaarnissaat siunertaavoq: Immami pisuussutit nungusaataanngitsumik toqqammaveqarluni iluaqutigineqarnissaat, qanoq iliorluta aaqqiissutinik nungusaataanngitsumik toqqammaveqartunik amerlanernik pilersitsisinnaavugut.

Saqqummiussininnilu nungusaataanngitsumik toqqammaveqarnerup inuiaqatigiinnitsinni nutaajunnginnera iserfigaara, piniakkanimmi nungusaataanngitsumik toqqammaveqarluni iluaquteqarnermik eqqarsariartaaseq uanga najugaqarfinni Thulemi ukiut 100-t sinnerlugit matuma siorna toqqammavigineqarpoq. Immaqa nunarsuarmi nunani siullertut. Pinngortitamullu, uumasunut isiginneriaatsitta, illersorneqarsinnaasumillu ataatsimut pisuussutitsinnik iluaquterput aqutsinerpullu sananeqaatitsinneereerpoq inuiaqatigiinnilu eqqarsariartaatsimi pingaartinneqarluni.

Pisuussutitta nungusaataanngitsumik toqqammaveqartumik iluaqutigineqarnissaat qulakkeerumallugu tamatta suliniutivut pitsaanerusumik ataqatigiissarlugillu pilersaarusiornissaat pisariaqarpoq. Naalakkersuisoqarfiit namminneq oqartussaaffigisaannarminni sulinatik naalakkersuisoqarfiit akimorlugit sulisarnissaat qulakkeerniarlugu Namminersorlutik Oqartussani suliamik annertuumik aallartitsisoqarpoq. Ingammik inuussutissarsiornermut, ilinniartitaanermut, peqqissutsimit isumaginninnermullu immikkoortuni akimuisumik eqqarsartoqarnissaa pingaaruteqarpoq, immikkoortumi taakku iluatsittumik ingerlanissamik kissaateqarneq anguneqassappat imminnut pinngitsoorsinnaanngillat.

Tulliullugulu nungusaataanngitsumik toqqammaveqartumik ineriartornerup tungaanut suliniarnermi inunnik ataasiakkaanik ikittunik tunniusimasunik aallaaveqarluta sulinnginnissatta qulakkeernissaanut pikkorinnerulernissatta tikkuarnissaa pingaaruteqarpoq – sulinermi tamanna Namminersorlutik Oqartussat suliffeqarfiinut tamanut siaruarneqartariaqarpoq. Aatsaat taamaaliornikkut nungusaataanngitsumik toqqammaveqartumik suliniutit pisariaqartut naammassineqarsinnaapput.

Taakkuinnaanngillalli. Namminersorlutik Oqartussat tungaannit suliniutinik inuusuttut aamma suliami tassani pingaarutilimmi soqutiginnilernissaannik qulakkeerisussanik aallartitsissaagut. Tamannalu nunatsinni isorartoqisumi digitalinngorsaanerup siaruarneranik aallussinikkut ilaatigut pissaaq. Tamanna marloqiusamik iluaqutissartaqarpoq. Inuusuttummi ilatsiinnalersimasorpassuit suliaqartilernissaat nittartakkami inuit naapeqatigiittarfii aqqutigalugit pitsaanerpaamik anguneqarsinnaammat – peqatigisaanillu inuiaqatigiinni digitalinngorsaanerup siaruarterneratigut immitsinnut qaninnerulissaagut. Tassa iluaqutissartaq marloqiusaq.

Naalagaaffeqatigiit Nunarsuarmioqatigiinnut anguniagassarititaat arlallit pitsaasuupput – inuiaqatigiinnilu unammilligassatsinnut isumassarsiffissaalluarlutik. Ataatsimoorluta Naalagaaffiit Peqatigiiffiata Nunarsuarmioqatigiinnut anguniagassarititaannik ilisimanninneq siuariartertsigu – ataatsimoorlutalu anguniakkat suliniutinut sukumiisunngortitsigit, taamaalilluni taakku inuiaqatigiinni ikittuinnaanngitsunut amerlasuunillu iluaqusiisinnaanngoqqullugit.

Inussiarnersumik inuulluaqqusillunga


Vittus Qujaukitsoq
Aningaasaqarnermut Naalakkersuisoq


Attavissaq: Nikolai S. Christensen E-mail nsch@nanoq.gl