Nunani avannarlerni killerni peqqissutsimut naalakkersuisut ataatsimeeqatigiinnerat

12. – 13. marts 2019 nunani avannarlerni killerni peqqissutsimut naalakkersuisut ataatsimeeqatigiinnerat

Peqqissutsimut Naalakkersuisoq Martha Abelsen nunani avannarlerni killerni peqqissutsimut naalakkersuisut naalakkersuisoqatini marluk Sigrid Stenberg Savalimmiuninngaanneersoq aamma Svandis Svavarsdottir Islandimeersoq Savalimmiuni ataatsimeeqatigeqqammerpai.

Ataatsimiinnermi nunat taakku ullumikkut peqqinnissaqarfiup iluani suliniutit ilisimatitsissutigaat. Nunani tamani pingasuusuni siunissami peqqinnissaqarfik taassumallu inummut ataasiakkaamut inuaqatigiinnullu pitsaaliuinikkut suliaqarneq ukkatarineqarpoq. Island ilaatigut peqqinnissakkut periusissiartik nutaaq ilisimatitsissutigaat. Kalaallit Nunaat isumaginninnikkut peqqinnissakkullu pitsaaliuinermi suliat ataatsimoortippaat, suliassaqarfiit suleqatigiinnerat siuarsarniarlugu, Savalimmiunilu peqqinnissaqarfimmut ineriartornissamut pilersaarut aallartisaleruttorpaat inuiaqatigiillu peqqinnerulernissaanut oqartussaqarfik pilersillugu.

Ataatsimiinnermi peqqissutsimut naalakkersuisut qulequttat immikkut ittut eqqartorpaat: nakorsaatit peqqinnissamillu sullissisunik atorfinitsitsineq.

Peqqissutsimut naalakkersuisut nunaminni nakorsaatit pillugit unamminartut qanoq aqunneritsik ilisimatitsissutigaat. Savalimmiormiut nakorsaatit akisuut pillugit aningaasartuutit aqunnissaanut aallartitsisimapput nakorsaatinik atuinerup pitsaanerusumik nakkutigineratigut nakorsaatinullu isumalioqatigiissitamik pilersitsinikkut. Qulequtaq taanna pillugu nakorsaatinik nioqqutissiorfik pulaarneqarpoq tassanilu ilisimatitsissutigineqarluni sorliit Savalimmiuni nioqqutissiarineqartarnersut.

Peqqinnissakkut sullissisunik atorfinitsitsiniarnermi unamminartut tassungalu tunngatillugu inissisimaneq nunat imminnut ilisimatitsissutigaat. Nunat tamarmik assigiinngitsunik unamminiagaqarput ajornatorsiullu iluarsiniarlugu qanoq iliuuseqarnerlutik eqqartorpaat. Oqallisigineqarpoq ajornartorsiut nutaamik aaqqiissutissaqartariaqartoq massakkut aaqqiissutissamut periarfissat naammannginnerat pissutigalugu. Taassuma saniatigut peqqinnissamut naalakkersuisut ilinniartitaanikkut atorfinitsitsiniarnerullu iluani qanoq suleqatigiissinnaanerat oqallisigaat.

Martha Abelsen oqarpoq: ”Peqqinnissaqarfiup iluani ataatsimut ajornartorsiutigut tusarlugit pissanganarpoq. Tusarliussassaq ilinniartitaanermut naalakkersuisumut ingerlateqqissavara kaammattuutigalugulu peqqinnissaqarfimmut tunngatillugu ilinniarnermut suleqatiginninnissaq pillugu oqaloqatigiinneq aallartisarnissaanut”.

Aalajangerneqarpoq ataatsimiinneq tulleq Kalaallit Nunaanni august 2020-mi pissasoq.
Paasisaqarnerujumallutit attavigiuk naalakkersuisup allattaa Inger Heilmann Larsen oqarasuaatikkut.: +299 55 41 60 imaluunniit e-mailikkut: ihla@nanoq.gl