Oqitsuinnaanngitsunik suliassaqarpusi

Naalakkersuisut Siulittaasuat Kim Kielsen aamma Ineqarnermut Attaveqaqatigiinnermullu Naalakkersuisoq Karl Frederik Danielsen marlunngornermi maarsip aqqaneq aappaanni Ilulissani Perorsaanermik Ilinniarfimmi, SPS-mi, ilinniartunut saqqummiipput. Saqqummiineranni Majoriami ilinniartut aamma peqataapput.

Nalakkersuisut Siulittaasuata Kim Kielsenip ilinniartunut saqqummiinermini pingaarnertut oqariartuutigaa nunatsinni kinguaassiutitigut atornerluisarneq minnerunngitsumillu nunatsinni qitornatsinnik  sumiginnaasarneq inuiaqatigiittut ataatsimoorluta akiugassarigipput, tassanilu SPS-mi ilinniartut siunissami ilinniakkaminnik naammassinnikkunik immikkut pingaaruteqarluinnartumik inissisimasut oqariartuutigalugu:

’’Nunatsinni sumiginnaasoqarsimatillugu pinartumik suliniuteqapallattarnissarput pimoorunnerusariaqarparput. Ilissilu tassanerpiaq pingaaruteqarluinnartumik inissisimalerumaarpusi!’’.

Nunatsinni kinguaassiutitigut atornerluisarneq akiorniarlugu qinikkat, atorfilittat allallu susassaqartut kisimiillutik aaqqiivigisinnaanngikkaat Naalakkersuisut Siulittaasuat ilinniartunut saqqummiinermini erseqqissaavoq. Suliassaqarfiit kisiisa isumalluutiginagit angajoqqaat, innuttaasullu tamarmiullutik akisussaaffimmik tiguseqataasariaqartut Naalakkersuisut Siulittaasuat isumaqarpoq.

Nunatsinni tamatta akisussaaffeqarpugut. Nunaqqatigummi atugarliortut pineqarput. Ilissi ilinniakkassinnik naammassinnikkussi imaannaanngitsumik nukissamik inuiaqatigiinni pilersitsisussaavusi. Kisianni eqqaamassavarsi kisimiillusi suut tamaasa suliarisinnaannginnassigit. Innuttaasut aamma peqataasariaqarput.” Kim Kielsen SPS-mi ilinniartunut oqalugiarnermini oqarpoq.

Naalakkersuisut Siulittaasuata saqqummiinermini aamma ilanngullugu ilinniartut kaammattorpai tapersersoqatigiinneq kaammattoqatigiinnerlu akunnerminni atussagaat.

Siunissami suliassasi eqqarsaatigalugit ilaanni oqimaatsunik aqqusaagaqartarumaarpusi. Uanga nammineq politiitut misilittakkakka tassani assersuutigisinnaavakka. Kisianni ikioqatigiinneq tapersersoqatigiinnerlu atorlugu suligaanni eqqarsaatit oqimaatsut suliarineqarsinnaapput. Immissinnut ikorfartoqatigiinnissarsi taamaattumik pingaaruteqarluinnarpoq.” Kim Kielsen oqarpoq.

Perorsaasunngorniarfimmi ilinniartunut saqqummiisoqarnera nuannerpoq

SPS-mi immikkoortortaqarfimmi pisortaq Lena Mathiassen Fly ilinniartut saqqummiivigineqarneranni najuuppoq. Lenap ilinniartunut kaammattuerpalaartumik saqqummiisoqarnera nuannaarutigaa:

Saqqummiiinerat qularinngilara ilinniartut iluaqutigilluarumaaraat. Ilinniartitsinitsinni inuiaqatigiilerinermi perorsaanerullu iluani sammisaqartarnitsinni tamakku aallaavigalugit oqallitsitsinermik pilersitsisinnaagami.” SPS-mi immikkoortotaqarfimmi pisortaq Lena Mathiassen Fly oqarpoq.

Sikkersoq Mathæussen, SPS-mi ilinniartitsisoq, aamma ilinniartunut saqqummiinermi peqataavoq. Sikkersoq ilinniartitsisutut aamma sakkussanik tunineqartutut  misigisimavoq:

’’Ilinniartitsisutut aamma KILLILIISA-p suliniutaa eqqarsaatigalugu assut paasisaqarluarpunga. Ulluinnarnilu ilinniartitsissutigisinnaasatsinnik aamma isumassarsillunga. Saqqummiussinerat uannut eqqarsaatersuutissanik pilersitsisoq oqarusuppunga. KILLILIISA-p siunertaa ersarippoq, uagullu suliniutip tikkuussinera atorluarsinnaagipput aamma isumaqarpunga.’’

Sikkerneq Mathæussenip aamma oqaatigaa, ilinniartunut ikorfartuinertalimmik saqqummiisoqarnera assut tulluartutut isigigini:

’’Ullormiit ullormut pisartut allanngorujussuarsinnaasarput. Tamanna saqqummiinermi aamma oqariartuutigineqarpoq. Tamannalu uagut aamma ilinniarfitsinni eqqummaariffigisarparput. Ilinniartut ilinniakkaminnik inerunik siunissami sullissinerup iluani aqqusaagassaat inuttut ataasiakkaarlutik pigiinnarnagit oqaasinngortittuarnissaat oqariartuutigineqarmat isumaqataallungalu tamanna nuannaarutigaara. Sullissinissaminnimi imminut atorlutillu sakkugisussaagamik imminut paarisariaqarput.’’ 

Sukumiinerusumik paasisaqarusuttut attaveqarfigisinnaavaat:

Naalakkersuisut Siulittaasuata allattaa Eqaluk Høegh oqarasuaat 56 24 50 imaluunniit e-mailikkut eqah@nanoq.gl