Perorsaanermik Ilinniarfik Ilulissaniittoq pulaarneqarpoq

Naalakkersuisup Ane Lone Baggerip Perorsaanermik Ilinniarfik/Socialpædagogisk Seminarium Ilulissaniittoq pulaarpaa.

Ilinniartitaanermut Naalakkersuisup Ane Lone Baggerip ulloq 5. marts 2019 Perorsaanermik Ilinniarfik/Socialpædagogisk Seminarium Ilulissaniittoq pulaarfigaa.

Oqaloqatigiinniarluni ataatsimiinnermi ilinniartut, ilinniartitsisut ilinniartunillu ilitsersuisartut ilinniarneq ilinniartullu inaanniinneq pillugit oqaatigisassaqarput.

Perorsaanermik Ilinniarfik/Socialpædagogisk Seminarium ilinniagassarpassuarnik neqerooruteqartarpoq. Ilinniarfiup tunngaviusumik inuussutissarsiutinut ilinniartitaanerniit ilinniartitaanernut ingerlaqqiffiusunut ilinniartitaanerit neqeroorutigisarpai. Tamanna isumaqarluni ilinniartorpassuaqartarmat ulluinnarni assigiinngitsunik pisariaqartitsisunik. Kisiannili ilinniartut assigiissutigaat angerlarsimaffimminniit ilinniartut ineqarfiannut nuuttariaqalernerminni isumaginiagassat pitsaanerusumik nassuiarneqartarnissaat kissaatigigamikku. Ilinniartut nalinginnaasumik inigisaminnik attartortitsisinnaanertik imaluunniit ineqarnermut akiliisanngissinnaanertik pillugit pitsaanerusumik paasissutissinneqartarsinnaasimagaluarput.

Ilinniartut Perorsaanermik Ilinniarfiup/Socialpædagogisk Seminariumip Avannaata Kommuneanut suleqatigiinnissamik isumaqatigiissuteqarsimanera nuannaarutigaat, ilinniartut meerallit paaqqinnittarfimmiititsisarnissaat qularnaveeqquserneqarmat sukkasuumillu innersuussisoqarsinnaalermat. Ulluinnaat toqqissisimanarnerulerput tamannalumi pissutaaqataavoq ilinniartut ilinniakkaminnik aallussisinnaanngornerannut.

Ilinniartut aammattaaq nunani allani soorlu Canadami Alaskamilu paaqqinnittarfinni suliffinnik misiliillutik imaluunniit paarlaasseqatigiillutik periarfissarisinnaasaannut tunngatillugu pitsaasunik isummersorput. Tamakkunani ilinniartut immikkut perorsaanermut tunngasunik soorlu ADHD-mut autismemullu tunngasunik annertunerusunik ilisimasaqalersinnaapput.

Erseqqinnerusunik paasissutissinneqarusukkaanni immikkut siunnersorti Sussi Wille attaveqarfigineqarsinnaavoq. Toqq/direkte 345616 e-mail: suwb@nanoq.gl