Ilaqutariit paarsisartut pillugit suliassaqarfimmut pitsanngorsaatissanik isumassarsiorneq

Ulluni makkunani Naalakkersuisoq Martha Abelsen Nunani Avannarlerni Killerni Peqqinnissamut ministerit ataatsimiinnerannut peqataalluni Savalimmiuniippoq. Tikeraarnermut atatillugu Naalakkersuisoq Martha Abelsenip ilaqutariit paarsisartut pillugit suliassaqarfik qanoq aaqqissugaasimanersoq aamma ingerlanneqarnersoq pillugu ilisimatinneqarnissaminut ulloq ataaseq immikkoortissimavaa.

Kalaallit Nunaanni ilaqutariit paarsisartut pillugit suliassaqarfik kommunit kisimik suliassaraat. Meeqqat tapersersorneqarnissaannut inatsimmi aalajangersakkat malillugit neqeroorutinik meeqqat neqeroorfigineqartarnissaat kommunit qulakkeertussaavaat, soorlu aamma ilaqutariinnik paarsisartunik pissarsiortarnerup, ilinniartitsinerup aamma nakkutilliinerup suliarineqarnissaat qulakkiigassarigaat. Savalimmiuni suliassaqarfik agguartaarneqarsimavoq, taamaalillutik kommunit meeqqat aamma ilaqutariinni paarsisartuniinnerminni ineriartornerat ukkataraat, qitiusumilli oqartussat ilaqutariit paarsisartut ukkataralugit. Tassa imaappoq qitiusumik oqartussaasoq ilaqutariit paarsisartut pillugit akuersisarpoq, ilinniartitsilluni, siunersiueqatigiinnermik ingerlatsisarluni aamma nakkutilliisarluni.

”Savalimmiuni qitiusumik oqartussat aamma kommunit akornanni suliassat agguataarnerat assut soqutiginartippara. Taama immikkoortitsisimanerup kommunit meeqqanik ineriartornerannillu ukkatarinninnerisa 100 %-iunissaa qulakkeertarpaa, taannalu ilutigalugu qitiusumik oqartussaasoq iluarsagaanikkut sinaakkutinik aamma ilaqutariit paarsisartut pissutsit atugaat pillugit ukkatarinnittuulluni”
taama oqarpoq Naalakkersuisoq Martha Abelsen nangillunilu: ”Kalaallit Nunaanni ilaqutariit paarisartorpassuit ilinniagaqarnerunissamik, malitseqartitsivigineruneqarnissamik aamma nalinginnaasumik pissutsinik pitsaanerusunik ujartuisut ilisimavarput. Kommunit Namminersorlutillu Oqartussat akornanni Savalimmiusulli suliassanik agguataarineq kommunit suleqatigalugit misissoqqissaartariaqarparput”

Savalimmiuni ilaqutariit paarsisartut pillugit suliassaqarfik aamma ilaqutariit paarsisartut ilorrisimaarnerat pillugit aaqqissuulluakkamik aammattaaq nalilersuisoqartarpoq. Tamatuma kingorna nalilersuinerit taakku ilaqutariit paarsisartut atugaasa pitsanngorsaavigineqarnissaat siunertaralugu suliniutinut tunngaviliisarput.

”Naalakkersuisut borgmesterillu akornanni politikkikkut ataqatigiissaarisartoqatigiit ataatsimiinnissaanni tulliuttumi Kalaallit Nunaanni ilaqutariit paarsisartut pissutsit atugaat pillugit assingusumik nalilersuinissaq pillugu periarfissaq oqallisigerusuppara, taamaalilluta kingornatigut suliassaqarfik pillugu ineriartortitsinissamut, ilaqutariit paarsisartut pisariaqartitaannik aallaavilimmik, pilersaarusiorsinnaavugut” naggasiivoq Naalakkersuisoq Martha Abelsen.

Paasisaqarnerorusukkuit attavigiuk ministerip allattaa Inger Heilmann Larsen, e-mail: ihla@nanoq.gl