Siunnersuisarfik Tusaannga

Meeqqat illersuisuata nalunaarusiaq ”Soriarsinnaajunnaarneq oqariartuutinngoraangat” saqqummiussimavaa, nalunaarusiami saaffiginnissutit MIO-p 2012-imili tigusarsimasai nassuiaasiorneqarput. Nalunaarusiami oqaatigineqarpoq nunatsinni inuttut suli unammilligassaqartoqartoq.

Ajornartorsiutinulli nalunaarusiami erseqqissaaffigineqartunut aaqqiissutissat arlallit suliaralugit aallartinneqareerput.


Innuttaasut februaari 2019-imili periarfissarilerpaat, Tusaannga, siunnersuisarfiusoq nutaaq attavigissallugu. Tusaannga innuttaasunut nalunngisaminnit imaluunniit najugarisami oqartussanit ikiorserneqarsinnaannginnermik misigisimasunut ajornartorsiumminnik oqaloqatiginninnissamut pisariaqartitsisunut neqeroorutaavoq. Tusaannga tamatuma saniatigut innuttaasut ajornartorsiutaannik ikiuisinnaasunut siunnersuuteqarsinnaasunullu innersuussisinnaavoq.

Maannamut oqarasuaatikkut siunnersuisarfiusimasut arlallit neqeroorutinut assigiinngitsunut immikkoortitigaasimapput, assersuutigalugu imminut toqunnissamik eqqarsaatillit, ilaqutariittut siunnersorneqarusuttut aamma meeqqat oqarasuaatikkut saaffigisinnaasaannik neqerooruteqartoqartarsimavoq. Aamma meeqqat inuusuttullu MIO-p siunnersuisarfianut SMS-ikkut nassiussinissamut periarfissaqarsimapput, soorlu tamanna MIO-p nalunaarusiaani oqaatigineqartoq.

Tusaannga aqqutigalugu siunnersuisarfiit tamarmik oqarasuaatip normuanut ataatsimut aamma SMS-ip normuanut ataatsimut katersuunneqarput, tassa nunami innuttaasunit sianerfigineqarsinnaasunngorlugit. Innuttaasut 801180 sianerfigisinnaavaat imaluunniit 1899 SMS-erfigisinnaavaat.

Normut atuutereersut, soorlu Attavik 146, meeqqat saaffiginnittarfiat 134, ilaqutariinnut siunnersuisarfik suli atuutissapput, normut taakku toqqaannartumik Tusaanngap normuanut nutaamut ingerlateqqinneqartassapput.

”Oqarasuaatikkut siunnersuisarfitta ataasiinnarmik normulerneqarnera soorunami iluaqutaassaaq. Pingaaruteqarpoq ajornartorsiutit MIO-p saqqummiussai qaangerniarlugit innuttaasut Tusaanngamut saffiginnittarnissaat”
oqarpoq Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen.

Nalunaarusiami ersersinneqarpoq kommunit innuttaasut nalunaarutaannik saaffiginnissutaannillu malitseqartitsiniarnermik suli unammilligassaqartut. Meeqqat tapersersorneqarnissaannut inatsit 2017-imeersoq naapertorlugu kommunit akisussaaffigaat saaffiginnissutinik malitseqartitsinissaq aamma innuttaasut ikiorsinnaaniarlugit tapersersorsinnaaniarlugillu naapertuuttumik iliuusissanut pilersaarusiornissaq.

”Meeqqat tapersersorneqarnissaannut inatsit kommunit isumaginninnermi suliassat torersumik isumaginissaannut ikorfartuisussaavoq. Paasinarporli kommunit inatsisitigut aalajangersakkanik atuutsitsiniarnerminni piffissamik atuisariaqarnerat. Taamatut oqareerlunga oqaatigissavara kommunit inatsisitigut pisussaaffiligaallutik akisussaaffeqarput Naalakkersuisut naatsorsuutigisaattut malitassaminnik”
Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Innuttaasunut imminut toqunnissamik imaluunniit imminut ajoqusernissamik eqqarsaateqartunut, innuttaasunut kinguaassiuutitigut innarlerneqarsimanermut atatillugu ikiorneqarusuttunut, innuttaasunut persuttagaasartunut, innuttaasunut aanngajaarniutinik atuiunnaarnissaminnik ikiorneqarusuttunut imaluunniit pinnguaatinik atornerluinerminnik ikiorneqarusuttunut neqerooruteqareerpoq.

Paasisaqarnerorusukkuit Naalakkersuisup allattaa Inger Heilmann Larsen e-mail: ihla@nanoq.gl imaluunniit oqa. +299 554160 aqqutigalugit attavigiuk