Tanbreez Mining Greenland A/S-ip piiaanissamik qinnuteqaataata killiffia

Tanbreez Mining Greenland A/S (Tanbreez) Narsap Qaqortullu akornanni Killavaat Alannguanni eudialyteqarneranik misissueqqissaarnissamut akuerineqarsimavoq. Aatsitassaq eudialyt pinngoqqaatinik niobiumimik, tantalummimik, zirkoniummimik aammalu aatsitassanik qaqutigoortunik assut akoqarpoq, taakkulu saffiugassanut akussatut akooruminarsaatitullu atorneqartarput kiisalu oqarasuaatini angallattakkani, anorisaatini aammalu orsussani immersartuni atorneqartarlutik. Eudialyteqarnerata saniatigut aatsitassaqarfik feldspatimik amfibolimillu akoqarpoq. Aatsitassat taakku pinngortitami arrorsinnaapput aammalu nunarsuatsinni piffinni allani soorlu sioqqani nalunnguartarfinni feldspatimut amfibolinullu qanittuullutik.

Tanbreez-ip pilersaarutigaa ukiumut akuiagassaq 500.000 tons piiartassallugu. Taakku ujaqqerivimmi piiaasarnertulli piiarneqarsinnaapput. Ujaqqat piiakkat aserorterneqassapput. Immikkoortiterineq pisassaaq saviup kajungerisaa atorlugu, taamaaliornikkullu aatsitassat aappalaartunut (eudialyt), qaqortunut (feldspat aammalu qernertunut (amfibol) immikkoortiterneqassallutik. Tanbreezip kissaataa tassaavoq aatsitassaq eudialyt aappalaartuusoq nunani allani akuiaavinnut aallarunneqartassasoq, tassanilu eudialyt ilaatigut svolvsyre atorlugu pinngoqqaatinut immikkoortiterneqassalluni, pinngoqqaatillu nioqqutigineqarsinnaasut nioqqutigineqartassallutik.

Aatsitassarsiorfiit allat assigalugit pilersaarut iluatsinngitsooratarsinnaavoq. Periaatsit eudialytimik immikkoortiterinermi atorsinnaasut suli nassaarineqarsimanngimmata pilersaarut ajutoorsinnaalluarpoq. Taamaammat pilersaarut pitsaanerpaamik ineriartortissinnaajumallugu Tanbreez aallaqqaammut annikitsuinnarmik tunisassiorniarpoq. Tunisassiorneq iluatsilluariaruni annertusineqarsinnaavoq.

Tanbreez kiisalu Aatsitassanut Suliffeqarnermullu Naalakkersuisoqarfik massakkorpiaq tigussaasumik pitsaasumillu paaseqatigiinniarlutik oqaloqatigiipput qallukkanik nioqqutigineqarsinnaasunik Tanbreezip takutitsillunilu killiliinissaa pillugu, tassami aatsitassanut inatsit naapertorlugu iluaqutigineqarsinnaasumik aatsaat takutitseqqaarlutik killileeqqaarlutillu piiaanissamut akuersissummik tunineqarsinnaagamik. Pilersaarut piviusunngortinneqassappat piiaaffiup sananeqarneranut, piiaanermut piiaaffiullu matuneqarneranut nunat tamalaat piumasaqataat pitsaanerpaat malinneqartariaqarput ilaatigut piiaaffik isumannaallisaanikkut, peqqissutsikkut, avatangiisitigut, pisuussutinik atorluuanikkut inuiaqatigiinnilu nammanneqarsinnaasumik ingerlasinnaaqqullugu.

Aatsitassanut Suliffeqarnermullu Naalakkersuisoq Erik Jensen ima oqaaseqaateqarpoq:” Aatsitassarsiorfiliariniagaq angisoorsuunngilaq, ingerlalluarunili ukiuni qulikkaani qassiini ingerlasinnaalluni. Kujataanilu ilorraap tungaanut saatitsinissaq pisarialerujussuuvoq. Taamaammat pilersaarutip nunatsinnut, Kommune Kujallermut aammalu Tanbreezimut iluaqutaanissaa ilungersuutigisariaqarparput. Suliffissanimmi pilersitsinissaq aningaasatigullu inuiaqatigiit annertunerpaamik pissarsiaqarluarnissaat Naalakkersuisut anguniagarimmassuk”.

Kommune Kujallermi borgmesteri Kiista P. Isaksen, ima oqaaseqaateqarpoq: ”Tanbreezip aatsitassanik tunisassiulernissaa Kommune Kujallermit qilanaareqaarput. Aatsitassarsiorfiit annerpaamik pissarsiffigineqarnissaat 2014-imiilli kommunimit siunniunneqarsimavoq. Suliffissat kisiisa eqqarsaatiginngilavut, aammali aatsitassarsiorfiup sullinneqarnerani sapinngisamik annerpaamik peqataanissarput siunniusimavarput. Suliffeqarfiit kommunimi ittut kiffartuussinissamik isumaqatigiissuteqarsinnaanerat inuussutissarsiutitigut ineriartortitsinerup iliuatsilluarnissaanut apeqqutaasut ilagilluinnarpaat. Tamatumuunakkut pissutsit ajorsiartuinnarnerat kommunimi nalaassimasarput unitsinneqarsinnaavoq, borgmester Kiista P. Isaksen oqarpoq”.

Tanbreez Mining Greenland A/S-ip pisortaanera Greg Barnes ima oqaaseqaateqarpoq:

Oqiliallaatigeqisatsinnik maanna takusinnaalerparput Tanbreezip pilersaarutaa kiisami siumut aallarsimasoq. Tanbreezimeersugut Naalakkersuisoq Erik Jensen pingaartumillu Kommune Kujalleq kiisalu borgmester Kiista P. Isaksen ikiuunnerannut qutsaviginiarpakka”.

 

Sukumiinerusumik paasisaqarusukkuit attavigiuk naalakkersuisoqarfiup pisortaa Jørgen Hammeken-Holm, joeh@nanoq.gl, oqarasuaat +299 34 68 46.