Ilinniartitaanermut Naalakkersuisoq GUX Nuummi ilinniartunit immersorneqartoq

Ilinniartitaanermut Naalakkersuisoq Ane Lone Bagger Nunatsinni ilinniarfiit piffissami aggersumi tikeraartarniarpai ilinniartut ilinniarnerminnik misigisaat tusarniarlugit ilaatigullu ilinniakkamik unitsitsiinnartarnerit appartinniarlugit qanoq iliortoqartariaqarnera aamma ilanngullugu.

Ane Lone Baggerip GUX Nuuk februaarip 21-iani pulaarpaa tassanilu atuarfiup tikilluaqqulluarlugu. Ilinniartut uniinnannginnissaannut taamaalillunilu amerlanerit ilinniarnertuunngortarnissaannut suliniutissanik arlalinnik pitsaasunik sulisunit ilinniartunillu isummanik pitsaasunik tuniorarneqarpoq.

Assersuutigalugu ilinniartut pingaartillugu sammivaat attaveqaatit pitsaasut, atuaqatit ilinniartitsisullu pitsaasut qanoq pingaartigineri. Inooqatigiinnermi akulerusimanngikkaanni atuartitsinerlu pimoorullugu tigunngikkaanni ilinniakkamik unitsitsiinnarnissaq aarlerinaateqarnerusartoq ilinniartut ilaasa aamma tikkuarpaat. Akulerusimanngikkaanni ilinniartumut ataasiinnarmut tunneq ajortoq aamma tikkuarneqarpoq, tassami aamma ilinniartunut allanut aamma tuttarpoq ilinniarneq akisussaaffeqartumik tigunngikkaanni atuartitsinermilu peqataalluni.

Ilinniartunit atuarfimmillu aamma oqaluttuarineqarpoq ilinniartut inaanni ilinniartut atugarissaarnissaasa pingaarutaat. Ilinniartut qaammammut naammattunik nerisassaqarnissaasa pingaarutaa oqaluuserineqarpoq – aamma ilinniarnermusiat nunguleraangata. Ilinniartut iniminni pitsaasumik aalaakkaasunillu atugaqarnissaat siunertaralugu ilinniartut inaanni atukkat patajaallisarnissaat atuarfiup sammisaa.

”Iluamik atugaqartoqarnissaata qulakkeerniarlugu iliuuseqarnissarput pingaartorujussuuvoq. Assersuutigalugu nerisassanut tunngasunik ernummateqanngikkaanni ilinniarneq pitsaanermik ukkatarineqarsinnaavoq. Tarnikkut timikkullu peqqissuugaanni inuunermi unammisassat oqinnerusutut misinnartarput, pissutsilli nalinginnaasut soorlu nerisassat amigaatigilerlugit tamanna ajornartorsiutinngorsinnaavoq. Atuarfinnit ilinniartunillu oqaloqateqarninnit isummat pissarsiakka qulequttat pingaarutillit suliareqqinnissaannut tunngavissiipput ,” Naalakkersuisoq Ane Lone Bagger taama oqarpoq.

Annertunerusumik paasisaqarusunnermi saaffigineqarsinnaavoq Lotte Kjær (Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik) Toqq/direkte 345723 lokj@nanoq gl