Kalaallit Nunaanni meeqqanik kingunerlutsitsisunik katsorsaasunik angalaqatigiittartoqarpoq

Kalaallit Nunaanni meeqqanik kinguaassiutitigut atornerlunneqarsimallutik kingunerlutsitsisunik katsorsaasunik angalaqatigiittartoqarpoq

Inersimasunik katsorsaasut angalaqatigiittartut pioreersut assigalugit meeqqanik katsorsaasunik angalaqatigiittartunik pilersitsisoqartariaqartoq, taama meeqqat illersuisuat Aviâja Egede Lynge oqarsimasutut Sermitsiamit issuarneqarpoq.

”Meeqqat illersuisuata meeqqanik katsorsaasunik angalaqatigiittartoqanngitsoq pillugu oqaasii ilumuunngitsut uparuassallugit uannut pingaaruteqarpoq”, oqarpoq Naalakkersuisoq Martha Abelsen, nangillunilu ”meeqqanik katsorsaasut angalaqatigiittartut novembari 2015-imi pilersinneqarput, taakkulu Isumaginninnermut Aqutsisoqarfiup kommuninut neqeroorutaasa ilagaat”.

Isumaginninnermut Aqutsisoqarfiup ataani marlunnik angalaqatigiittartoqarpoq. Inersimasunik meeraanerminni kinguaassiutitigut atornerlunneqarsimallutik kingunerlutsitsisunik katsorsaasunik angalaqatigiittartoqarpoq. Angalaqatigiittartut aappaat meeqqanik kinguaassiutitigut atornerlunneqarsimallutik kingunerlutsitsisunik katsorsaallutik angalaqatigiittartuupput. Meeqqanik katsorsaasut angalaqatigiittartut novembarimi 2015-imi pilersinneqarput.

Meeqqanik katsorsaallutik angalaqatigiittartut katsorsaanerat kommunit suleqatigalugit ingerlanneqarpoq, taamaalilluni katsorsaaneq sioqqullugu aamma katsorsaareernerup kingorna Ilaqutariinnut sullissiviit qanimut suleqatigeqqissaarneqartarput.

Sumiiffinni pisinnaasatigut ineriartorneq patajaallisarniarlugu angalaqatigiittartut ulluinnarni meeqqanik suliatigut sullitaqartunut pikkorissaanerit, siunersiueqatigiinneq, atornerlunneqarsimasunik ilaqutaannillu ilinniartitsineq il.il. neqeroorutigisarpaat. Tamanna sumiiffinni ataasiakkaani pisariaqartitsineq apeqqutaatillugu ingerlanneqartarpoq. Pisinnaasanik ineriartortitsinerup kinguaassiutitigut atornerlunneqarsimallutik kingunerlutsitsisunik katsorsaanermik sumiiffinni, katsorsaasut angalaqatigiittartut aallareeraangata, suliaqarnerup patajaallisarnissaa siunertaraa.

Maannakkut kommunit tamarmik tassanngaannartumik suliassaqalersillugu sulisinnaasunik upalungaarsimatitsisoqarput, matumani kinguaassiutitigut atornerluisoqarsimaneranik pasinnittoqarnera ilanngullugu.

Meeqqanik katsorsaallutik angalaqatigiittartoqatigiit ulloq manna tikillugu meeqqat 100-t missaat katsorsarsimavaat.

Paasisaqarnerorusukkuit attavigiuk Aqutsisoqarfimmi pisortaq Hans Peder Barlach Christensen, e-mail: hpbc@nanoq.gl, oqa +299 535706