Ane Lone Baggerip Peqqissaanermik Ilinniarfimmi ilinniartunik oqaloqateqarluni ataatsimeeqateqartarnini nangeqqippai

Ilinniartitaanermut Naalakkersuisup, Ane Lone Baggerip, Peqqissaanermik Ilinniarfimmi ilinniartunik oqaloqateqarluni ataatsimeeqateqartarnini nangeqqippai.

Ilinniartitaanermut Naalakkersuisup, Ane Lone Baggerip, ulloq 19. februar 2019 Peqqissaanermik Ilinniarfik ilinniartut ulluinnarni ajornartorsiutigiunnagaannik oqaloqatiginiarlugit pulaarpaa.

Ilinniartut Ilinniartitaanermut Naalakkersuisup, Ane Lone Baggerip, oqaloqatiginissaanut piareersarsimapput. Ilinniartut soqutiginnilluartut ilinniagaqareerunik annertuumik akisussaaffeqalernissartik oqaatigaat, innuttaasut ajornartorsiutillit utoqqalisullu isumassorneqartussaammata.

Kisiannili ulloq taanna oqaloqatigiinnermi aalajangersimasumik suliaqalerniarluni ilinniarfimmi ilinniartutut ulluinnaat ingerlasarnerata aqunneqarnissaa sammineqarpoq, ilinniarfimmiittassagamik suliffeqarfimmilu misiliisartussaallutik.

Ilinniartuulluni peqatigitillugulu meeqqanut mikisunut angajoqqaajulluni unammilligassat ilaatigut oqaluuserineqarput. Tassami ullukkut paaqqinnittarfinnut utaqqisut allattorsimaffii utaqqinarsinnaapput ilinniartullu amerlasuut illoqarfimmi najugaqarfiginngisaminniinngitsoq suliffimmik misiliisussaasarput. Tamatuma kingunerisarpaa meeraasa paaqqinnittarfimmi allami ilanngutsinniarneqarnissaat. Aningaasaqarnerlu aammattaaq amikkisaarnarsinnaavoq, ineqarnermut akiligassat, nerisassanut, bussinut ulluinnarnilu pisariaqartitanut allanut aningaasartuutit akilerneqareeraangata.

”Ilinniagaqartut oqaatigaat ulluinnarni ulapaartuaannarlutik. Tassami peqqinnissaqarfimmi sulisuupput ullukkorsiortarlutik, unnukkorsiortarlutik unnuarsiortarlutillu ilinniakkaminnullu atatillugu suliassatik allat angumeriniartariaqartarlugit. Ilinniarnerminnut tunngatillugu soqutiginnittorujussuupput”, Naalakkersuisoq Ane Lone Bagger, ilinniarfinnut, ilinniartutut misilittagaannik nalaattagaannillu tusarniaalluni, pulaaqattaartoq oqarpoq.

Erseqqinnerusunik paasissutissinneqarusukkaanni Ilinniartitaanermut, Kultureqarnermut Ilageeqarnermullu Naalakkersuisoqarfimmi immikkut siunnersorti, Sussi Wille, oqarasuaat: 345616 atorlugu attaveqarfigineqarsinnaavoq.