2019-imi Arnat Ulluat

Marsip arfineq-pingajuat Arnat Ullorivaat, nunanilu tamalaani arnat inuiaqatigiinni naligiissitaanissaat ukkatarineqassaaq. Nunatsinni angutit arnallu naligiissitaanerat eqqarsaatigalugu angusaqarluarnikuuvugut, kisianni suli tamaviaarutissarpassuaqarpoq.

- Marsip arfineq-pingajuani inuiaqatigiitsinni arnat naligiissitaanerisa qanoq inissisimanerata eqqarsaatiginisaanut pissutissaqarluarpoq. Nunarsuaq tamakkerlugu eqqarsaatigissagaanni angusaqarluarpugut. Nunatsinni arnat ilinniarsinnaallutillu sulisinnaapput, aamma arnat timersornermi, kulturimi politikkimilu angutitulli atugassaqarlutik peqataasarput, taama Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq imalu nangilluni:

- Angutilli arnallu naligiissitaanerannik aarlerinartorsiortitsisunik atuuttoqarpoq ingerlaavartumik ukkanneqartariaqartunik iliuuseqarfigineqartariaqartunillu. Nakuusertarnerit assut amerlapput, pingaartumillu niviarsiaqqat arnallu navianartorsiortinneqartarput. Ukiorpassuarni nakuusertarnerit pimoorussilluni, ilaatigut suliniut Kattunneq aqqutigalugu, ikilisarniarneqarsimapput nakuusertarnerillu pitsaaliorniarlugit pimoorussilluni suli sulisoqassaaq. Politiinit nalunngilarput isumakkut aalassassimaanermi nakuusertoqartartoq amerlanertigullu imigassartorpallaarsimasut nakuusertartut. Taamaattumik nakuusernermik pitsaaliuineq eqqarsaatigalugu aanngajaarniutinik pitsaaliuineq iliuuseqarfissaavoq pingaarutilik.

- Angutit arnallu naligiissitaanerannik siuarsaanermi inuiaqatigiitsinniittut tamarmik iliuuseqartariaqarput, naligiissitaanermillu paasinnittariaaseq assigiissoq meeraanermi toqqammavilerneqassaaq. Angutit arnallu naligiinnerannik assigiinnillu periarfissaqarnerannik paasinnissinnaanngortillugit meeqqavut perorsassavavut. Tunngaviusumik imminik allanillu ataqqinnissuseqartillugit perorsassavavut. Ataqqinninneq, akaarinninneq, unneqqarinneq assigiimmillu naleqarneq inuiaqatigiinni, oqaatsitigut timikkullu nakuusernermik akuersaarfiunngitsumi, naleqartitaapput tunngaviusut,
taama Naalakkersuisoq Martha Abelsen, naggasiivoq.

Suliniummi Kattunnermi 2014-imiilli ilaqutariinnik nakuuserfigineqartunik sullissinermi qimarnguiit nukittorsarnissaat sulissutigineqarpoq. Qimarnguiit nukittuut angerlarsimaffimmi nakuusernernik ikilisaanermi annikillisaanermilu sunniuteqarsinnaasut qularutigineqanngimmat Kattunneq pilersinneqarpoq. Suliniummi pingaarnertut qimarnguinni sulisut sulinermi pikkorinnerulernissaat qimarnguiillu allanik suliaqartunik akimut suleqateqarnerunissaat ukkatarineqarpoq.

Mary Fonden, Danner, nunatsinni qimarnguiit, Mælkebøttecenteri, Isumaginninnermut Inatsisinillu Atuutsitsinermut Naalakkersuisoqarfik kiisalu OAK Foundation Denmark suleqatigalugit suliniut Kattunneq pilersinneqarpoq marsillu arfernanni Nuummi oqaloqatigiilluni ataatsimiinnermi naggaserneqarluni. Nakuusertarneq suli ajornartorsiutaammat annertooq oqaloqatigiilluni ataatsimiinnermit oqariartuutigineqarpoq qimarnguiit sulinerat Isumaginninnermut Aqutsisoqarfiup oqartussaaffigisaanik suli tapersersorneqassasoq.

Paasisaqarnerujumallutit attavigiuk naalakkersuisup allattaa Inger Heilmann Larsen oqarasuaatikkut: +299 55 41 60 imaluunniit e-mailikkut: ihla@nanoq.gl