Aalisarneq pillugu Ataatsimiititaliarsuup sulinissaanut tunngavigineqartussaq ullumi akuersissutigineqarpoq

Naalakkersuisut Aalisarneq pillugu Ataatsimiititaliarsuup sulinissaanut tunngavigineqartussaq ullumi martsip 8-ni 2019-imi akuerivaat.

Aalisarneq pillugu Ataatsimiititaliarsuaq aalisarneq pillugu Inatsisartut inatsisaata oqaaseqaatit ilanngullugit nutarternissaanut inatsisitigut sinaakkusiisinnaasunik siunnersuusiussasoq. Aalisarneq pillugu Inatsisartut inatsisaat normu 18, 31. oktober 1996-imeersoq atuutilersinneqarnerata kingorna 13-eriarluni allanngortinneqarsimavoq, taamaammat paasiuminartumik, nalitsinnut naleqquttumik atuisussanut piuminarsakkamik aalisarneq pillugu inatsisiliornissaq pisariaqartinneqarpoq.

-“Nuannaarutigaara Naalakkersuisut Aalisarneq pillugu Ataatsimiititaliarsuup sulinissaanut tunngavigineqartussaq ullumi akuersissutigimmassuk. Aalisarneq pillugu Ataatsimiititaliarsuup sulinermini pingaarutilippassuit qulaajartussaavai, aalisarneq pillugu Inatsisartut inatsisaata allanngortinnissaanut tunngavigineqartussaallutik. Neriuppunga Aalisarneq pillugu Ataatsimiititaliarsuarmi ilaasortat suliaminnut tunniusimallutillu tapersersuillutik suleqataajumaartut, inatsit allaqqunneqarsinnaanngitsumik siunissami ukiorparujussuarni atuuttussaammat”, Aalisarnermut, Piniarnermut Nunalerinermullu Naalakkersuisoq Nikkulaat Jeremiassen oqarpoq.

Ataatsimiititaliarsuup sulinermini ilaatigut suliniutaasinnaasoq ataaseq arlallilluunniit ataaniittut anguniakkap angunissaanut tapersiisinnaasut naleqqussusiat misissoqqissaassavai nalilersorlugillu:
  • Pisuussutinik atuinermut sinaakkutinik aqutsineq
  • Piginnittuunermi pisassiissutillu pillugit pissutsit kiisalu aningaasaliissuteqartitsisinnaaneq
  • Unammilleqatigiinnissamik qulakkeerinninneq aalisarnermilu piginnittuunermik annertunerusumik siammaasinnaaneq
  • Aalisakkanik pisuussutinik atuinermi annertunerusumik naleqalersitsineruneq
  • Siunnersuutit ataatsimiititaliarsuarmit suliarineqartut aningaasatigut allaffissornikkullu kingunissaat
Aalisarneq pillugu Ataatsimiititaliarsuarmut eqqartuussissuserisoq Jens Paulsen Naalakkersuisut siulittaasussattut toqqarpaat.

Uani atuarsinnaavat aalisarneq pillugu ataatsimiitsitaliarsuup sulinissaanut tunngavissiaq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl