Ældreminister Thyra Frank Kalaallit Nunaannut tikeraarpoq

Ilulissani ministerit marluk ataatsimiinneranni utoqqaat amerliartortut, agguaqatigiissillugu ukiut inuuffiit amerliartornerat, utoqqaat sullinneqarneranni sulisussarsiornermik ajornartorsiuteqartarneq aamma utoqqaat pillugit politikki tassaapput sammineqartut ilaat Peqqissutsimut, Isumaginninnermut Inatsisinillu Atuutsitsinermut Naalakkersuisup Martha Abelsenip qallunaallu ældreministeriata Thyra Frankip oqaloqatigiissutigisaat. Qallunaat ældreministeriat Thyra Frank Kalaallit Nunaanni utoqqarnut suliassaqarfik paasisaqarfiginerorusullugu Kalaallit Nunaanniippoq.

”Agguaqatigiissillugu ukiut inuuffiit amerliartornerat pitsaasuuvoq,taamaattorli taamaattoqarnerata – aamma utoqqaat amerliartornerisa – aaqqiissutissanik nutaanik eqqarsartariaqalernerput kinguneraa. Misilittakkatsinnik pitsaasumik paarlaasseqatigiippugut, ilaatigut qanoq ililluta utoqqarnut amerliartortunut sinaakkutissanik pitsaasunik pilersitsinissaq pillugu,” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

Paaqqinninnermik isumassuinermillu suliassaqarfinni qanoq ililluni amerlanerusut sulilersinneqarsinnaanersut pillugit apeqqummut ministerit taakku marluullutik soqutiginnipput. Tassami Danmarkimi aamma Kalaallit Nunaanni utoqqaat amerliartortillugit sulisussat amerlanerusut pisariaqartinneqaleriartorput.

”Utoqqaat illuini paaqqinniffinnilu sulisut ullut tamaasa inuiaqatigiinni utoqqartatsinnik paaqqutarinninnermik suliamik annertuumik pingaaruteqartumillu suliaqartarput. Suliaq uagut inuiaqatigiittut nersortariaqagarput. Inuusuttut amerlanerusut suliassaqarfiup iluani ilinniagaqalerumaartut neriuutigaara,” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq innersuussutigalugulu inuusuttut amerlanerusut paaqqinninnermik isumassuinermillu suliassaqarfinni ilinnialernissaannut ussassaarut Danmarkimi ingerlanneqartoq isummersuiffigisinnaagipput.

Ministerit ataatsimiinneranni Naalakkersuisoq Martha Abelsenip Naalakkersuisut utoqqaat illersuisussaannik pilersitsiniarnerisa aamma utoqqarnut politikkimik suliaqarnerisa ingerlanneqarneri oqaluttuarai. Utoqqaat illersuisoqarfissaannik pilersitsineq aamma utoqqarnut politikkimik suliaqarnissaq Naalakkersuisut naalakkersuisooqatigiinnissamik isumaqatigiissutaanni takuneqarsinnaavoq.

”Utoqqarnut politikki sorpassuarnut tunngassuteqarpoq. Utoqqarnut suliassaqarfimmi qallunaat misilittagaat tusaallugit soqutiginarpoq, taakkulu utoqqarnut politikkissamik suliaqarnitsinni isummersuiffigisinnaavagut. Nunami utoqqartatsinnut inuuniarnikkut atugassarititaasut pitsanngorsarneqarnissaat Naalakkersuisut utoqqarnut politikkianni aallaaviuvoq,” Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen naggasiivoq.

Qallunaat ældreministeriat Thyra Frank piffissami 4. – 8. marts Kalallit Nunaanniippoq (Ilulissat aamma Nuuk). Naalakkersuisumit Martha Abelsenimit ataatsimeeqateqarrnermi saniatigut ædreminister Thyra Frankip ilaatigut Avannaata Kommuniani Kommuneqarfik Sermersuumilu borgmesterit ataatsimeeqatigai, Ilulissani napparsimavik aamma Dronning Ingridip Napparsimavia, Ilulissani Utoqqaat Illuat Unganartoq, Nuummilu sammisaqartitsiviullunilu utoqqaat illuat Ippiarsuk pulaarlugit, soorlu ældreministerip utoqqaat peqatigiiffiat Utoqqaat Nipaat kaffisoqatigalugit ataatsimeeqatigisimagai.


Attavissaq
Paasisaqarnerorusukkuit attavissaq tassaavoq naalakkersuisup allattaa Inger Heilmann Larsen e-mail: ihla@nanoq.gl imaluunniit tlf. + 299 554160