Pisuussutini pingaarnerpaavusi

Naalakkersuisut Siulittaasuat Kim Kielsen aamma Ineqarnermut Attaveqaqatigiinnermullu Naalakkersuisoq Karl Frederik Danielsen tallimanngornermi maarsip arfineq pingajuanni Teknikkimik Ilinniarfimmi Sisimiuniittumi, KTI-mi, ilinniartunut saqqummiussipput, tamatumalu kingorna ilinniartut apeqquteqarnissaannut periarfissiillutik.

Nalakkersuisut Siulittaasuata Kim Kielsenip ilinniartunut saqqummiinermini pingaarnertut oqariartuutigisaa tassaavoq ilinniakkaminnik naammassinnittartut amerlanerulernissaat nunatta pisariaqartikkaa:

Nunatta pisussuutaasa pingaarnersaraasi. Ilissi nunatsinni ingerlatsineq aqutsinerlu nangittussaavarsi.” Kim Kielsen KTI-mi ilinniartunut oqalugiarnermini oqarpoq.

Naalakkersuisut Siulittaasuata ilinniartut kaammattorpai ilinniakkamik ingerlatsinerminni tapersersoqatigiinneq kaammattoqatigiinnerlu akunnerminni atussagaat.

Inuusuttut amerlanerusut ilinniagaqarnissaat – ilinnikkamillu naammassinnittarnissaat - pisariaqarpoq, taamaattumik ilissi meeraanissinniit ikinngutisi atuaqatigisimasasilu ilinniakkamik aallartitsitisimanngitsut nalunngisasi ilinniagaqarnissaannik aamma kaammattortarniarisigit. Nunatsinni sulisinnaasut amigaataareerput, taamaattumik inuusuttut akornanni ilinniakkamik ingerlatsisut amerlanerulernissaat pisariaqarpoq.”  Kim Kielsen oqarpoq.

Inuuneq narlusuinnamik ingerlaffiunngilaq

Ilinniagaqarnerup nalaani inuuneq narlusuinnarmik ingelaffiuneq ajortoq Ineqarnermut Attaveqaqatigiinnermullu Naalakkersuisup Karl Frederik Danielsenip saqqummiinini aallarnerlugu oqaaseqarpoq.

Karl Frederik Danielsen ukiuni kingullerni atuarfinni assigiinngitsuni pisortatut sulisimasoq, siornalu ukioq naajartulersoq naalakkersuisuni ilaasortanngortoq imminut aallaavigaluuni akisussaaffimmik tigusisarnermut tunngasunik saqqummiussaqarpoq.

Anaanama toqunissaa sioqqullugu akisussaaffimmik tigusinissara annerusumik isumaliutigineq ajorpara. Meeraanitsinni ataataga namminersortutut suliffiuteqarpoq, uagullu inuunerput oqitsumik atorparput. Anaanamali toqunerata kingorna ataatama suliffeqarfiutaa aamma naggataatigut matuvoq. Tamatuma kingorna qatanngutigiit tamarmiulluta akunnitsinni isumaqatigiippugut tamaviaarniarluta – tamattalu ilinniagaqarniarluta. Atukkat oqitsorsiorfiuinnarneq ajorput, kisianni ilungersornikkut qaangerneqarsinnaasarput.” Karl Frederik Danielsen oqarpoq.

Ilinniartunut kaammattuisoqarnera nuannerpoq

KTI-mi pisortaq Jokum Møller ilinniartut saqqummiivigineqarneranni najuuppoq. Jokum Møller-ip ilinniartunut saqqummiisoqarnera nuannaarutigaa:

Ilinniartut tikillugit kajumissaarlugit inuiaqatigiinnilu atorfissaqartinneqarnerannik saqqummiivigineqarnerat nuannerpoq. Ilaatigut ilinniakkamik unitsitsiinnartarnermut pissutaaqataasinnaasut ilanngullugit saqqummiussuunneqarmata immaqa inuit ilaannut sakkortulaarsinnaagaluarpoq, kisianni kinguaasiutitigut atornerluisarnerit imminortarnerillu akiorniarneqarnerannut tunngasut Naalakkersuisuniit eqqumaffigineqarnerat ersersinneqarmat aamma qujanarpoq.” KTI-mi pisortaq Jokum Møller oqarpoq.

Sukumiinerusumik paasisaqarusuttut attaveqarfigisinnaavaat:

Naalakkersuisut Siulittaasuata allattaa Eqaluk Høegh oqarasuaat 56 24 50 imaluunniit e-mailikkut eqah@nanoq.gl

Ineqarnermut Attaveqaqatigiinnermullu Naalakkersuisup allattaa Steve Sandgreen oqarasuaat 55 06 75 imaluunniit e-mailikkut stes@nanoq.gl