Naalakkersuisut avaleraasartuunut ammassassuarnullu 2019-imut agguaassinermi piumasaqaatit aalajangerpaat

Naalakkersuisut decembarip 20-anni 2018-imi avaleraasartuunik ammassassuarnillu ukiumut pisassiissutit agguaappaat, 2019-imut tassaassapput 59.729 tonsit aamma 25.000 tonsit.  Naalakkersuisut avaleraasartuunut ammassassuarnullu agguaassinermi piumasaqaatit marsip aallaqqaataani 2019-imi aalajangerpaat.


Avaleraasartunik ammassassuarnullu agguaassinermut piumasaqaatit 2019-imi atuuttut pillugit

una atuaruk

2019-imi immikkoortoq 2-qassanngilaq
2019-imi avaleraasartoorniarnermut ammassanniarnermullu allannguut pingaarneq tassaavoq immikkoortunut agguaassineq atorunnaarsinneqartoq. 2019-imi taamaallaat piginneqatigiiffiit angallatinik Kalaallit Nunaanni angerlarsimaffilinnik peqartut avalaraasartuunut ammassassuarnullu pisassiissutinik agguaaffigineqarput. Tassa imaappoq piginneqatigiiffiit nammineerlutik angallataateqanngitsut, siusinnerusukkut immikkoortoq 2-mik taaneqartarsimasut, 2019-imi avaleraasartuunut ammassassuarnullu pisassiissutinik agguaaffigineqanngillat.

Immikkoortoq 2-mut siunertaasimasoq tassaagaluarpoq ingerlatseqatigiiffiit tassaniittut ukiut ingerlaneranni nammineerlutik ikerinnarmi ingerlatitsisuunngussasut. Pissutsilli tunngaviusut takutippaat ingerlatseqatigiiffiit immikkoortoq 2 aqqutigalugu avaleraasartoorniarnermut peqataasimasut akornanni ataaserluunniit ikerinnarsiornermut aalisarnermut nammineerluni aallartitsisimanngitsoq aallartitsingajassimananiluunniit. Siullermik una pissutigalugu, ikerinnarsiorluni aalisarnermut ukiumut pisassiissutit naammaannarsimasarput, peqataasullu nutaat ukiumut ilivitsumut aalisarnissamut periarfissaqarsimanngillat. Aappaattut pissutigalugu isertitat immikkoortumi tassani ingerlatseqatigiiffiinnut aamma naammaannarsimasarput.

Ingerlatseqatigiiffiit nammineerlutik angallataatillit nunatta karsianut tapeeqataanerpaapput. Tassalu avaleraasartuunut pisassiissutigineqartut 10 %-imik appariarmat agguaassinermi ingerlatseqatigiiffiit nunatsinni angerlarsimaffilinnik angallataateqartut salliutinneqarsimapput.

Tamanna aamma Naalakkersuisooqatigiinnissamut isumaqatigiissummut oktobari 2018-imeersumut naleqquttuuvoq:

”Aalisakkanik ikerinnarsiortunik pisassiisarnermi pisassiissutit amerlanerpaat aalisariutinut nunatsinneersunut pisassiissutigineqartassapput...”

Qinnuteqaatinut immersuiffiit qinnuteqaateqarfissamullu killiliussaq
Avaleraasartuunut ammassassuarnullu qinnuteqaatinut immersuiffik atorneqassaaq. Qinnuteqaammik pissarsiniaruit una tooruk:

Qinnuteqarnermi immersuiffissaq

Qinnuteqaateqarfissaq kingulleq tassaavoq marsip 21-at 2019, qinnuteqaallu uunga nassiunneqassaaq: apnn@nanoq.gl


Saaffiginniffik: Jákup Emil Hansen, AC-fuldmægtig, Aalisarnermut, Piniarnermut Nunalerinermullu Naalakkersuisoqarfik. E-mail: jaeh@nanoq.gl