Statsministerip Naalakkersuisullu Siulittaasuata ataatsimeereernerisa kingorna oqaaseqaat

Statsministeri, Naalakkersuisut Siulittaasuat aamma Kalaallit Airports Holding A/S ullumikkut piginnittuunermut isumaqatigiissut selskabimut kalaallit qallunaallu ataatsimoorlutik pigisaannut Kalaallit Airports International A/S-imut tunngasoq atsioqatigiissutigaat.

Naalagaaffiup mittarfissuassanut suliniummut peqataanerat inaarutaasumik akuereqqullugu Folketingip Finansudvalgianut tunniunneqassaaq.

Statsminister Lars Løkke Rasmussen ima oqaaseqarpoq:

”Naalagaaffeqatigiinnerput nukittuujulluni ineriartorlunilu siumukartuussasoq kissaatigaara. Tamannalu ullumi isumaqatigiissutip atsiornikkut aamma naqissuserpara. Ukiut arlaqanngitsut qaangiuppata, Kalaallit Nunaata illoqarfittut pingaarnersaannut Nuummut Ilulissanullu iluliarpassuaqarfimmut toqqaannartumik timmisartukkut tikittoqarsinnaalissaaq. Pisoq manna Kalaallit Nunaannut imminut annertunerusumik napatittussamut nukittunerulersussamullu alloriarneruvoq pingaarutilik.

Mannalu aqqutigalugu Folketingi ataatsimoorluni mittarfissuassanut suliniummut Naalagaaffiup peqataanissaa tapersersoraat uppernarsarusuppara. Peqatigiilluta Kalaallit Nunaanni inuussutissarsiornikkut ineriartornissaq, suliffissanik pilersitsinissaq aningaasatigullu isertitassat nutaat pilersissavagut.”

Naalakkersuisut Siulittaasuat Kim Kielsen ima oqaaseqarpoq:

”Isumaqatigiissutip matuma qallunaat Naalakkersuisuisa, uagullu Naalakkersuisutta Kalaallit Airports Holding peqatigalugu atsiukkatta pimoorullugu naqissuserpaa Nuummi Ilulissanilu mittarfissuassat nunanit tamalaanit tikinneqarsinnaasussat suliarineqarnerat aallartinneqartoq. Isumaqatigiissut manna Kalaallit Nunaata Danmarkillu akornanni suleqatigiinnerup nutaap Inatsisartunit ilalerneqarsimasumut naapertuuttuuvoq.

Naalakkersuisut tassunga atatillugu Naalagaaffiup mittarfissusassanut suliamut peqataanerata mittarfiit aningaasaqarnerannut pitsanngorsaataanissaa pingaartippaat. Suliniut siunissami atuisussanut assut nuannaarutaasussaavoq.”

Annertunerusumik paasiniaavissat:

Statsministeriami attaveqaat: Pressesekretær Karen Clement, oqarasuaat +45 33 92 22 59

Naalakkersuisut Siulitaasuata Naalakkersuisoqarfiani attaveqaat: Ministersekretær Eqaluk Høegh, telefon +299 56 24 50