Nuup Mittarfianut ASN akuerineqarpoq

Naalakkersuisut 1. marts 2019-imi Nuup Mittarfiata allineqarnissaanut ASN-imut akuersissut tunniuppaat. Akuersissut sanatitsisumut Kalaallit Airports A/S-imut tunniunneqarpoq. ASN-imut akuersissut avatangiisinut piumasaqaatinik, mittarfiup allineqarneranut atatillugu malinneqartussanik imaqarpoq. ASN-imut akuersissut ASN-imut nassuiaat kiisalu tamanut ammasumik tusarniaanerit ingerlanneqarsimasut tunngavigalugit nalunaarutigineqarpoq, taakkunanngalu kingulleq 16. november 2018-imiit 14. december 2018-imut ingerlanneqarpoq.

ASN sunaana?
ASN tassaavoq Avatangiisinut Sunniutissanik Naliliineq. ASN-imut nassuiaat sanaartugassami avatangiisinut kingunerisassat tulleriiaarlugit saqqummiunneqarnerinik imaqarpoq. Nassuiaat aamma suliniutissanut, avatangiisinut sunniutaanerluttussanik akiuiniarnermi atorneqartussanut siunnersuutinik imaqarpoq.

ASN-imut akuersissut sunaana?
ASN-imut nassuiaat tunngavigalugu Naalakkersuisut sanaartukkap avatangiisinut sunniutissaannut isummertussaapput, kiisalu piumasaqaatinik atugassarititaasunillu, sanaartornermi malinneqartussanik aalajangersaasussaallutik.

Inatsisit
ASN-imik suliassaqarfik ukunani maleruagassiuunneqarpoq:
  • Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq
  • Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq (kapitali 8).
ASN-imut akuersissut uani atuarneqarsinnaavoq.

Annertunerusumik paasisaqarusunnermi attaveqarfissaq: Immikkoortortaqarfimmi pisortaq Karen Anne Arleth, tlf.: 345465 aamma e-mail: knar@nanoq.gl